केपी शर्मा ओली नेतृत्वया सरकार गठन जूगु स्वदँ पूवन
लहनान्यूज | सिल्लाथ्व चतुर्थी ११४१, फागुन ३ सोमवाः
![](https://www.lahananews.com/sites/default/files/pm-kp-sharma-oli_0.jpg)
प्रधानमन्त्री केपी शर्मा ओली नेतृत्वया सरकार गठनया स्वदँ पूवंगु दु ।
तत्कालीन नेकपा एमाले व माओवादी केन्द्र दथुइ पार्टी एकीकरण धुंकाः जूगु निर्वाचनय् करिब स्वब्वय् निब्व मत चूलाःगु लिसें राजनीतिक स्थिरता, समृद्धि व सुशासनया नारालिसें २०७४ फागुन ३ गते ओली नेतृत्वया सरकार गठन जूगु खः ।
थःगु नेतृत्वया सरकारं स्थिरता, विकास व सुशासनय् चमत्कारी ज्या यानागु प्रधानमन्त्री ओलीया दाबी दु । तर ताः इलंनिसें सरकारया ज्याय् नेकपा दुने हे थीथी न्ह्यसः दनीगु जुयाच्वंगु दु ।
पार्टी दुने ब्वलंगु विवादया हे हुनिं प्रधानमन्त्रीं प्रतिनिधिसभा विघटन यायेधुंकाः नेकपा ब्वदःगु दु ।
लिपांगु राजनीतिक अस्थिरतां प्रधानमन्त्री ओलीं न्ह्यःने हःगु राजनीतिक स्थिरिताया नाराय् हे न्ह्यसः दंगु दु । अथे हे, शक्तिशाली सरकार जूसां विकास निर्माणया ज्या लुधनेबहः मजूगु कुंखिना दु ।
ओलीया नेतृत्वय् सरकार गठन जुइधुंकाःया स्वदँया इलय् १२क्वःगु खुसी मन्त्रिपरिषद् पुनर्गठन जूगु दु ।
झण्डै स्वब्वय् निब्व बहुमतया सरकार गठन जूगु स्वदँया इलय् दक्कले अप्वः मन्त्री ह्यूगु मन्त्रालयस कानुन, न्याय तथा संसदीय मामिला मन्त्रालय लाः । स्वदँया इलय् उगु मन्त्रालयस ६ मन्त्री वःगु दु ।
ओली नेतृत्वया सरकारया मन्त्रालय थुगु इलय् विवादय् लात । सञ्चारमन्त्री गोकुल बास्कोटाया ७० क्वःति कमिसन काण्ड अले कोरोनाया उच्च जोखिमया इलय्या ओम्नी काण्डं ओली सरकारयात विवादया च्वकाय् थ्यंकूगु दु ।
स्वदँय् जूगु ज्याबारे प्रधानमन्त्री ओलीं थौं सिंहदरबारं ब्रिफिङ यायेगु तयारी यानादीगु दु ।
Categorized in राष्ट्रिय