कोरोनाविरुद्धया खोपया ३गूगु झ्वया अभियान न्ह्यात
लहनान्यूज | सिल्लाथ्व तृतीया ११४१, फागुन २ आइतवाः
![](https://www.lahananews.com/sites/default/files/53277727_101_0.jpg)
थौं निसें कोरोनाविरुद्धया खोपया ३गूगु झ्वया अभियान न्ह्यागु दु ।
३गूगु झ्वया खोप अभियानय् सरकारी ज्याकु, सार्वजनिक संस्थान लिसें बैंकया कर्मचारी, पत्रकार, स्थानीय तगिंया निर्वाचित जनप्रतिनिधि, सीमा सुरक्षा पोस्टय् खटेजूपिं सुरक्षाकर्मी व न्हापा त्वफिउपिं स्वास्थ्यकर्मीयात खोप बिइगु स्वास्थ्य तथा जनसख्या मन्त्रालयं न्ह्यथंगु दु ।
पत्रकार व कूटनीतिक नियोगया कर्मचारीयात खोप बिइधुंका मेगु झ्वया खोप ज्याझ्व फागुन २ निसें ८ तक्क निर्धारण याःगु खः । फागुन २निसें जुइगु अभियानय् ३ गू लखम्हसित खोप बिइगु सरकारया योजना दु ।
उमित न्हापांगु झ्वया न्हापांगु प्राथकिताय् लाःपिं स्वास्थ्यकर्मीयात खोप बिउगु थासं खोप बिइत्यंगु खः ।
थ्वयान्ह्यः भारतं १०गू लख ल्याःखय् कोभिसिल्ड खोप अनुदानय् बिइधुंका न्हापांगु झ्वलय् माघ १४ निसें २४ तक्क खोप ज्याझ्व न्ह्याकुगु खः ।
गुकिइ छगू लख ८१ द्वः ८ सः व ५७म्हसिनं खोप काःगु खः । खोप ज्याझ्वलय् ८२ गू प्रतिशत स्वास्थ्यकर्मीं खोप काःगु मन्त्रालयं न्ह्यथंगु दु ।
मन्त्रालयं निर्धारण याःगु निगूगु प्राथमिकताया वेैंश पुचःयात लक्षित खोप ज्याझ्वः धाःसा कोभ्याक्सपाखें खोप वयेधुंका न्ह्याकेगु योजना दयेकुगु दु ।