निगूगु झ्वःया खोप अभियान न्ह्यात
पोहेलागा द्धादशी ११४१, माघ २६ सोमवाः
![](https://www.lahananews.com/sites/default/files/53277727_101.jpg)
सरकारं थौंनिसें पत्रकार, युएन एजेन्सी, दूतावास लिसें कूटनीतिक नियोगया कर्मचारीयात कोरोना खोप बिइगु न्ह्याकेत्यंगु दु ।
भारत सरकारं अनुदानय् चूलाकुगु ‘कोभिशिल्ड’ खोप न्हापांगु झ्वलय् प्राथमिकताय् लाःपिं मनूयात बिइधुंका थौनिसें पत्रकार व कुटनीतिक नियोगया कर्मचारीयात खोप न्ह्याकूगु दु ।
११न्हूतक्क देय्यंकया थ्यंमथ्यं निसः केन्द्रपाखं छगू ८४द्वःम्हसिनं न्हापांगु मात्राया खोप तयेधुंका न्हापांगु झ्वया अभियान शनिवाः क्वचागु खः ।
न्हापांगु झ्वलय् स्वास्थ्यकर्मी लिसें कोरोनाभाइरस वासः यायेगु व व्यवस्थापनय् अग्रपङ्तिइ खटेजूपिन्त खोप बिउगु दु । थुगु झ्वलय् थ्यंमथ्यं ३गू लख मनूयात खोप बिइगु योजना दूगु मन्त्रालयं न्ह्यथंगु दु ।
निगूगु झ्व क्वचायेधुंका फागुनया निगूगु वालं निसें न्ह्याइगु धाःगु मेगु झ्वलं जक वैंश पुचःया मनूतयेत खोप बिइगु न्ह्याइ ।
थ्वहे दथुइ मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् लाःपिन्त खोप मतसें प्राथमिकता हे मदूपिन्त खोप बिइगु न्ह्याकुगु धका कुँख्यना न्ह्यागु दु ।
मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् पत्रकार व कूटनीतिक नियोगया कर्मचारी लाःगु मदु ।
लक्षित पुचःया प्राथमिकता कथं न्हापांगु् प्राथमिकताय् स्वास्थ्यकर्मी, सरसफाइकर्मी, एम्बुलेन्स लिसें शववाहन चालक, जेलया बन्दी व अन ज्या यानाच्वपिं सुरक्षाकर्मी, विमानस्थल व भन्सारया कर्मचारी, जेष्ठ नागरिकपिं व दीर्घल्वगियात तयातःगु खः । तर धलःखय् लाःपिं जेष्ठ नागरिक, दीर्घ ल्वगि लिसेंयापिन्सं खोप मकायेवं पत्रकार व कूटनीतिक नियोगया कर्मचारीयात बिइत्यंगु दु । थुगु निर्णययात जनस्वाथ्य विज्ञपिन्सं कुँख्यंगु दु ।