कोभ्याक्सया २२ लाख डोज खोप वइगु
पोहेलागा अष्टमी ११४१, माघ २३ शुक्रवाः
![](https://www.lahananews.com/sites/default/files/covax.jpg)
गरिब अले विपन्न देय्तय्सं चूलाकीगु ‘कोभ्याक्स’ सुविधाअन्तर्गत न्हापांगु चरणय् नेपालं फागुन न्हापांगु वालय् २२ लख ५६द्वः डोज खोप चूलाकीगु जूगु दु ।
थ्वयां न्ह्यः भारतं अनुदानय् ब्यूगु अक्सफोर्ड एस्ट्राजेनेकां विकास याःगु अले सेरम इन्स्टिच्युट अफ इन्डियां उत्पादन याःगु ‘कोभिसिल्ड’ खोप हे थ्व सुविधाअन्तर्गत वइ ।
स्वास्थ्य मन्त्रालयया कथं ‘कोभ्याक्सं’ खोप उपलब्ध याकेगु विषयस पत्राचार यायेधुंकूगु दु । ग्लोबल भ्याक्सिन अलाइन्स (गाभी) व विश्व स्वास्थ्य संगठन (डब्ल्युएचओ) जानाः ‘कोभ्याक्स’ सुविधा गठन जूगु खः ।
महामारी नियन्त्रण यायेत खोपया विकल्प मदुगु तर सुरुइ तःमि देय्तय्त जक दइगु अवस्था खनेदयेधुंकाः निगू संगठनं विपन्न देय्तय्त सहज रूपं २० प्रतिशत नागरिकयात गाइगु खोप उपलब्ध याकेगु प्रतिबद्धता प्वंकूगु खः ।
न्हापांगु चरणय् वइग्ु खोप ३ प्रतिशत अर्थात् ९ लख ११द्वः स्वयां आपाः नागरिकयात गाइ । कोभ्याक्सं झन्डै २० प्रतिशत नागरिकयात गाइगु खोप थ्वयां लिपा चरण–चरणय् बीगु स्वास्थ्य मन्त्रालयं न्ह्यथंगु दु ।
सरकारं न्हापांगु चरणय् ३ प्रतिशत नागरिकयात खोप बीगु योजना दयेकूगु खः । तर, भारतपाखें अनुदानय् १० लख डोज खोप जक वयेधुंकाः ४ लख ३०द्वः नागरिकयात बीगु कथं अभियान न्ह्यानाच्वंगु दु ।
महामारीविरुद्ध फ्रन्टलाइनय् खटे जुयाच्वंपिं चिकित्सक, स्वास्थ्यकःमि, सुरक्षाकःमि, स्वास्थ्य स्वयम्सेविका, सरसफाइकःमि, एम्बुलेन्स अले शवबाहन चालक, सीमा व विमानस्थलया कर्मचारी अले अन खटे जुयाच्वंपिं सुरक्षाकःमियात प्राथमिकताय् तयाः खोप बियाच्वंगु दु । १४ माघनिसें न्ह्याकूगु अभियानय् आःतक्क १ लख ५८ द्वः ४सः व ८७म्हेसिनं खोप काःगु दु ।
Categorized in राष्ट्रिय