भारतं नेपाःयात बिइगु अनुदान अप्वेकल
पोहेलागा चतुर्थी ११४१, माघ १९ सोमवाः
भारतं नेपाःयात बिइगु अनुदान अप्वेकूगु दु । आर्थिक वर्ष २०२१/२२ या नितिं सोमबाः बित्तमन्त्री निर्मला सीतारमणं सार्वजनिक याःगु केन्द्रीय बजेटकथं नेपाःयात दइगु अनुदान वंगु दँया आर्थिक वर्षया तुलनाय् १गू अर्ब ८९ क्वःति ध्येबा अप्वःगु दु ।
भारतीय वित्त मन्त्रालयकथं थ्व दँ नेपालं भारतपाखें १५ अर्ब ८७ करोड ध्येबा कायेदइगु जूगु दु ।
थ्वसिबें न्ह्यः आ.व. २०१९-२० नेपालं ११ अर्ब ९८ करोड अनुदान कयावयाच्वंगु खः ।
थ्वः बजेट अप्रिल २०२१ निसें कार्यान्वयनय् हई ।
भारतं न्हापांखुसी पेपरलेस बजेट हःगु खः गुकिइ स्वास्थ्य क्षेत्रयात उच्च प्राथमिकताय् तःगु खः ।
भारतं बिइगु अनुदान दकले अप्वः भुटानयात बियावयाच्वंगु दु ।
भारतं भुटानयात २० अर्ब ४ करोड भारु बिइगु क्वछिनातःगु दु ।
भारतं अनुदान बिइगु मेमेगु देय्त, अफगानिस्तानयात ३ अर्ब ५० करोड, बंगलादेश- २ अरब, श्रीलंका- २ अरब, माल्दिभ्स- २ अर्ब ५० करोड, म्यानमार- ४ अर्ब ध्येबा थुगुसी भारतं अनुदानकथं इनिगु जुई ।
Categorized in राष्ट्रिय
