कोरानाविरुद्धया खोप अभियान न्ह्यात, न्हापांगु खोप डा. सागर राजभण्डारीं कयादिल
राम डंगोल | पोहेलाथ्व चतुर्दशी ११४१, माघ १४ बुधवाः
![](https://www.lahananews.com/sites/default/files/Corona-Vaccine-bir-hospital-Nepal-9.jpg)
सरकारं कोरोनाविरुद्धया खोप अभियान थौंनिसें न्ह्याकूगु दु् । स्वनिगःया १७ लिसें देय्न्यंक सच्छि व २० केन्द्रपाखें खोप बीगु स्वास्थ्य तथा जनसंख्या मन्त्रालयं न्ह्यथंगु दु ।
प्रधानमन्त्री केपी शर्मा ओलीं थौं सुथय् १०ताः इलय् खोपया भर्चुअलपाखें शुभारम्भ यानादीगु खः । न्हापांगु चरणय् फोहर व्यवस्थापनय् खटे जुइपिं फोहर संकलक अले चालक, एम्बुलेन्स अले शववाहन चालक व सहचालक, प्रत्यक्ष वासः यायेगु सेवा बीपिं वा खोप व्यवस्थापनय् खटे जुइपिं स्वास्थ्यकःमिपिन्त खोप बीगु सरकारं न्ह्यथंगु दु ।
अथेहे, खोप केन्द्रय् खटे जुइपिं सुरक्षाकःमि अले स्वयंसेवक, शव व्यवस्थापनय् खटे जुइपिं, स्वास्थ्य स्वयंसेविका, अन्तर्राष्ट्रिय प्रवेश विन्दुइ ज्या याइपिं स्वास्थ्यकःमि व मेपिं कर्मचारी, वृद्धाश्रमया मनू अले सुसाःकुसालय् खटे जुइपिं कर्मचारी अले कारागारया कैदी व सुरक्षाकःमियात खोप बी । न्हापांगु खोप शुक्रराज ट्रपिकल तथा सरुवा रोग अस्पताल टेकुइ अस्पतालया निर्देशक डाक्टर सागर राजभण्डारीं कयादीगु खः ।
वय्कलं शुक्रराज ट्रपिकल तथा सरुवा रोग अस्पताल टेकुया हे केन्द्रय् खोप काय्धुंका खोप अभियान न्ह्याःगु खः ।
खोपया बारे यक्व आशंका खनेदुगुलिं खोप सुरक्षित दुगु हसना बीत थम्हं अस्पतालय् जुइगु ज्याझ्वलय् न्हापांगु खोप कयागु वय्कलं धयादिल । भारत सरकारया अनुदानय् माघ ८ गते १० लख मात्रा खोप नेपाल हःगु खः ।
स्वास्थ्य मन्त्रालयं न्हापांगु चरणया खोप अभियान न्ह्याकूगु १०न्हु दुने अभियान क्वचायेकेगु आज्जु तःगु दु । न्हापांगु चरणय् ४गू लखः व ३०द्वःम्हेसित खोप बीगु मन्त्रालयं न्ह्यथंगु दु ।
थ्वहे दथुई प्रधानमन्त्री केपी शर्मा ओलीं सरकारं लिबाक्क हे जूसां कोरोनविरुद्धया लडाइ त्याकेत न्ह्यनाच्वनागु धयादिल ।
कोरानाविरुद्धया खोपया न्हापांगु झ्वःल्या थौं शुभारम्भ यासें प्रधानमन्त्री ओलीं कोरानाविरुद्धया लडाइखय् सुरुवाती ईलय् सरकारं आम जनतापिनिगु इच्छाकथं ज्या यायेमपूmसां बुलूंहु थुकि बाँलाका यंकागु दावी यानादिल ।
Categorized in राष्ट्रिय