कोरानाविरुद्धया खोप माघ १४ गते शुभारम्भ
राम डंगोल | पोेहलाथ्व द्वादशी ११४१, माघ १२ सोमबाः
कोरानाविरुद्धया खोप थ्वहे माघ १४ गते निसे इनेगु जूगु दु । उगु खोप प्रधानमन्त्री केपी शर्मा ओलीं छगू ज्याझ्वः याना शुभारम्भ याइगु जूगु दु ।
भारत सरकारं अनुदानय् ब्यूगु कोरोनाया १० लख डोज खोप प्रदेशय् इनेगु न्ह्याःगु दु । सरकारं माघ १४ गते बुधबाःनिसें ७७ गुलिं जिल्लाया सच्छि व २० खोप केन्द्र व ६२ अस्पतालपाखें कोरोना भाइरस विरुद्धया खोप अभियान न्ह्याकीगु जूगु दु । न्हापांगु चरणय् ४ लख ३०द्वः जनसंख्यायात खोप बीगु तयारी स्वास्थ्य तथा जनसंख्या मन्त्रालयया दु ।
माघ १८ गते दुने ३सः खोप केन्द्रपाखें खोप बीगु न्ह्याकाः १० न्हु दुने क्वचायेकेगु मन्त्रालयं न्ह्यथंगु दु । स्वास्थ्यमन्त्री हृदयेश त्रिपाठीं स्वनिगःया प्रमुख अस्पताल व प्रदेशया खोप केन्द्र अले अस्पतालय् छक्वलं प्रधानमन्त्री केपी शर्मा ओलीं भर्चुअल माध्यमं खोप अभियान न्ह्याकेगु ज्याझ्वः दुगु जानकारी बियादिल ।
खोप वितरणया सम्बन्धय् मन्त्रालयं आइतबाः न्हय्गुलिं हे प्रदेशया मुख्यमन्त्रीतलिसे सहलह नं याःगु खः ।
न्हापांगु चरणय् फ्रन्टलाइनय् ज्या यानाच्वंपिन्त खोप बीगु तयारी याःगु सरकारं थुकिया लागिं नां धलः तयार यानागु न्ह्यथंगु दु ।
न्हापांगु चरणय् खोप काइपिंलय् २ लख २५द्वः ७सः व ८२ स्वास्थ्यकःमि, २ लख ४द्वः २सः व १८ सुरक्षाकःमि, एम्बुलेन्स चालक, शव व्यवस्थापक, सफाईकःमि लिसेंया मनूत दु ।
स्वास्थ्यमन्त्री त्रिपाठीं खोप निर्धक्क जुयाः कायेत सकसितं इनाप यानादिल । खोप काःम्ह मनूया धलः तकं सार्वजनिक जुइगु धासें वय्कलं जिल्ला कोभिड १९ खोप समन्यय केन्द्रपाखें प्रभावकारी अनुगमन जुइगु जानकारी बियादिल । छकः खोप काःगु ४वाः धुंकाः मेगु डोज खोप बीगु मन्त्रालयं न्ह्यथंगु दु ।
Categorized in राष्ट्रिय
