शहीद सप्ताह न्ह्यात
राम डंगोल | पोहेलाथ्व एकादशी ११४१, माघ ११ आइतवाः
शहीद सप्ताह न्ह्याःगु दु । शहीदया लुमंति छवाः तक्क शहीद सप्ताह याना वयाच्वंगु दु ।
तत्कालीन एकतन्त्रीय जहानियाँ राणा शासनविरुद्ध प्रजातन्त्रया पक्षय् सः थ्वयेकूगु हुनिं शहादत काःपिं प्यम्ह सपुत शुक्रराज शास्त्री, धर्मभक्त माथेमा, गंगालाल श्रेष्ठ व दशरथ चन्दयात मृत्युदण्ड बिउगु दिंया लुमंति शहीद दिवस न्यायेकेगु याः । सप्ताहया न्हापांगु दिं म्हिगः शुक्रराज शास्त्रीयात यखाःकुगु टेकूया सीमाय् बिचाः हायेकेगु ज्याझ्वः याःगु खः ।
अथेहे १३ गते सुथय् सिफलय् च्वंगु धर्मभक्त माथेमा यात यखाःकुगु थाय् अथेहे १५ गते सुथय् गङ्गालाल श्रेष्ठ व दशरथ चन्दयात गोलीं कयेकूगु थाय् शोभा भगवतीइ विचाः हायेकेगु येँ महानगरपालिकां न्ह्यथंग दु ।
वाः यंकया ज्याझ्वःया लिपांगु दिं माघ १६ गते शान्तिबाटिकाय् मुना नेपाल प्रहरी व सशस्त्र प्रहरीया ब्यान्ड, मार्चपास व शहीदपिनिगु किपाः दूगु बग्गीलिसें प्रभातफेरी याना शहीद उद्यान लैनचौरय् थ्यंका विचाः हायेकेगु ज्याझ्वः दु । प्रजातन्त्रया लागि सः थ्वयेके ज्याः याबले तत्कालिन राणा शासकतय्सं १९९७ साल माघ १० गते शुक्रराज शास्त्रीयात टेकूइ, माघ १३ गते धर्मभक्त माथेमायात सिफलय् व माघ १५ गते गङ्गालाल श्रेष्ठ व दशरथ चन्दयात शोभाभगवती मृत्युदण्ड बिउगु खः ।
