भक्तजनतय्त दर्शनया लागिं फत्तले सक्व मवयेत इनाप
लहनान्युज | पोहेलाथ्व नवमी ११४१, माघ ९ शुक्रवाः
![](https://www.lahananews.com/sites/default/files/sakwo%207.jpg)
श्री माधवनारायण स्वस्थानी व्रत तथा शालिनदी सुधार समितिं विहिबाः सक्वय् पत्रकार सम्मेलन यासें वइगु माघ १५ निसें माधवनारायण स्वस्थानी व्रत न्ह्यायेत्यंगु जानकारी याकल ।
मेला यायेगु वा मयायेगु धइगु अन्योलया दथुइ सक्वया नारीखुसिइ थुगुसीया स्वस्थानी व्रत न्ह्यायेत्यंगु दु । सिमित संख्याय् व्रतालुयात व्रत च्वनेबीगु जूसां दर्शनार्थीयात दर्शन गुकथं याकेगु धइगु खँय् धाःसा अन्योल दनिगु खनेदु ।
![](https://www.lahananews.com/sites/default/files/pictures/sakhu.jpg)
कोभिड संक्रमणया जोखिमया दथुइ थुगुसी भक्तजनयात ज्युत्तले दर्शनया लागिं नारी खुसि मवयेत समितिं इनाप याःगु दु । पत्रकार सम्मेलनय् शंखरापुर नगरपालिकाया प्रमुख सुवर्ण श्रेष्ठं व्रतालुया उसाँय्या सुरक्षायात ध्यानय् तयाः भक्तजनतय्त दर्शनया लागिं फत्तले सक्व मवयेत इनाप यानादिल ।
व्रतालुतय्गु स्वास्थ्य सुरक्षायात ध्यानय् तयाः सक्व थ्यनीपिं भक्तजनतय्त स्वयमसेवकपाखें प्रसाद इनेगु व तापाकं हे दर्शनया व्यवस्था यायेगु समितिया नायः मिजेन्द्रकाजी श्रेष्ठं धयादिल ।
वइगु फागुन १५ तक्क जुइगु लछिया व्रतय् व्रतालुतय् नितिं थुगुसी समितिं थीथी मापदण्ड क्वःछ्यूगु दु । व्रतय् च्वनेगु नितिं माघ १० गतेनिसें १२ गतेतक्क नां दर्ता याकेमाःगु व माघ १३ गते समितिं क्वःछ्यूगु थासय् पिसिआर वा एन्टिजेन परिक्षण याकेमाःगु धाःगु दु ।
व्रतय् च्वनेत निमोनियाया लक्षण मदुगु प्रमाणित यायेत एक्सरे रिपोर्ट अनिवार्य याःगु दु । व्रतालुया ग्वाहालिया नितिं छेँजःपिं तकं वयेमदइगु व सकतां व्यवस्था समितिपाखें हे जुइगु नं जानकारी ब्यूगु दु ।
स्वस्थानी व्रतया बाखनय् उल्लेख यानातःगु नवराज ब्राम्हणया राज्य लावण्य देय् कथं सक्वयात कयावःगु दु । परापूर्वकालय् पार्वतीं थ्व हे स्वस्थानी व्रत च्वनाः महादेव वर चूलाःगु धार्मिक विश्वास दु ।
Categorized in राष्ट्रिय