झिंछक्वःगु नेवाः एकता दिवसया इलय् वयाच्वंगु सन्दर्भय् वर्तमान राजनीतिइ नेवाः एकताया महत्वयात कयाः छगु विचाः गोष्ठी जूगु दु । उगु गोष्ठीइ नेवाः न्ह्यलुवाः मल्ल के. सुन्दरं नेवाःतय्गु आन्दोलनया मंकाः माग नेवाः स्वायत्त राज्य खः धका धयादीगु दु ।

उगु ज्याझ्वलय् वय्कलं सांस्कृतिक स्वायत्त केन्द्र नेवाःतय्गु मंकाः माग मखु धका धयादीसे झिदँ न्ह्यः येँया दशरथ रंगशालाय् सकल नेवाःपि मुनाः नेवाः तयेगु अधिकार संवैधानिक रुपं सुरक्षित यायेत नेवाः स्वायत्त राज्य माः धकाः धयादीगु खः। अथेहे वय्कलं नेवाः तयेगु थीथी मुद्दा दुसां व सकतां मुद्दा बिस्कं बिस्कं मखुसे छथाय् च्वनाः सः थ्वयेके माःगु विचाः उगु ज्याझ्वलय् बिचाः तयादीगु खः ।

थौं जुग उगु ज्याझ्वलय् नेवाः न्ह्यलुवाःपिनि पुचलं येँया नेपाः ब्यांक्वेटय् छगु विचाः गोष्ठीइ भिडियो सन्देशपाखें छ्वयाहःगु वयकःया छगु सन्देश खः। वय्कलं नेवाः स्वायत्त राज्यया नितिं नेवाः एकता आवश्यक जूगु विचाः प्वंकूसें बिस्कं बिस्कं मखुसे छप्पं जुयाः व छगू हे विचाः ज्वनाः न्ह्याःसा जक नेवाः एकता जुइगु खँ नं तयादीगु दु । अथेहे उगु ज्याझ्वलय् नेवाः न्ह्यलुवाः डा. पुष्पराज राजकर्णिकारं विचाः व सिद्धान्त मिलेजूपिं छथाय् च्वनाः न्ह्याकूसा जक नेवाः एकताया महत्व जुइगु, अथे मखुसे नांया नितिं जक एकता जुयां उकथं एकतां छुं नं उपलब्ध जुइगु मखु धका विचाः तयादीगु खः। लिसें वय्कलं सकल नेवाःत वर्तमान राजनीतिक स्थितिइ संसद विघटनयात कयाः विरोध याये माःगु विचाः नं तयादिगु खः।

मेम्ह नेवाः न्ह्यलुवाः तीर्थराम डंगोलं आः नेवाःतसें शक्ति प्रदर्शन यायेफुसा जक नेवाः अधिकार कायेफइगु मखुसा झीसं अधिकार कायेत थाकुइ धका  विचाः प्वंकादिगु खः। वय्कलं वइगु माघ ९ गते खोनाय् जुइगु झिंछक्वःगु नेवाः एकता दिवसय् ब्वति कायेत इनाप यानादीगु दु ।

अथेहे, उगु ज्याझ्वलय् नेवाः न्ह्यलुवाः भाषासेवी लक्ष्मीदास मानन्धरं नेवाः एकता दिवसया सन्दर्भय् वर्तमान राजनीतिइ नेवाः एकताया महत्व विषयस ज्याझ्वः याःगु लसता प्वंकूसें सकलसित सुभाय् व नेवाःत छप्पं जुयाः न्ह्यायेफयेमा धकाः कामना यासें भिंतुना पौ छ्वयाहयादीगु खः । उगु भिंतुना पौ नेवाः न्ह्यलुवाः उमेश स्थापितं ब्वनाः न्यंकादीगु खः ।ज्याझ्वलय् नेवाः न्ह्यलुवाः दिलीप महर्जनया नं उपस्थिति दूगु खःसा थीथी नेवाः न्ह्यलुवाःलिसें कार्यकर्तापिनिगु उपस्थिति दूगु खः

नेवाः न्ह्यलुवाः सुजीव बज्राचार्यं लसकुस यानादीगु उगु ज्याझ्वलय् सुभाय् नेवाः न्ह्यलुवाः भगवान शाक्यं तयादीगु खःसा ज्याझ्वः ललेन्द्र शाक्यं न्ह्याकादीगु खः । उगु ज्याझ्वःया प्रत्यक्ष प्रसारण नेवाः यूट्युबलिसें नेवाः सूचना केन्द्र व लहनान्यूजपाखें याःगु खः । 

Categorized in राष्ट्रिय