नेपालमण्डल टेलिभिजनया अध्यक्षय् नेपाल सुनचाँदी रत्न तथा आभुषण महासंघया केन्द्रिय अध्यक्ष रमेश महर्जन हाकनं निर्वाचित जुयादिगु दु।

 

यलया भोलध्वाखाय् च्वंगु ज्यापू समाजया भवनय् थौं शनिबाः जुगु नेपालमण्डल टेलिभिजनया ९ क्वःगु साधारण सभा लिसें निक्वःगु दँ मूज्यां महर्जनयात ४ दँया कार्यकालया लागि हाकनं अध्यक्षलय् सर्वसम्मतं चयन याःगु खः। मर्हजन थ्व निक्वःगु कार्यकालया लागि हाकनं अध्यक्षय् चयन जुयादिगु खः । अथेहे साधारण सभां संचालक समितिया दुजलय् उद्योगपतिपि पद्म ज्योति, दिपक श्रेष्ठ, ध्रुवकुमार श्रेष्ठ, अधिवक्ता मंगल महर्जन, कुमारराजा महर्जन, सिल्भिया राजोपाध्याय्, नातिभाइ महर्जन व शर्मिला महर्जनयात नं सर्वसम्मतं ल्यःगु खः।

 

नवनिर्वाचित अध्यक्ष महर्जनं वइगु कार्यकालय्  नेपालमण्डल टेलिभिजनं देशं दुने जक मजुसें  विदेशय् दुगु संघसस्थातलिसें जाना गुणस्तरीय ज्याझ्वः, समाचारया उत्पादन व प्रशारण यायेगु धयादिगु दु। ज्यापू समाजया अध्यक्ष चन्द्र महर्जनया मू पाहाँसूइ जुगु साधारणसभाय् नेपालमण्डल टेलिभिजनया आर्थिक वर्ष २०७६ व ०७७ या वार्षिक प्रगति प्रतिवेदन व  लेखा परीक्षक प्रतिवेदन प्रस्तुत यागु खसाः निदँ न्हयः नेपालमण्डल टेलिभिजनं ग्वसाः ग्वःगु कलाकार मनराजा साँगितिक ज्याझ्वःपाखें जुगु आम्दानीइ नेपाल मण्डल टेलिभिजन श्रस्ता सम्मान कोष नं स्थापना यागु दु।

 

उगु कोषया लागि संस्थापक सदस्यलिसें प्रबन्ध निर्देशक प्रकाशकाजी महर्जन, उद्योगपति बाबुराजा महर्जन, ज्यापू समाजया अध्यक्ष चन्द्र महर्जन, संचालक समितिया दुजपि मंगल महर्जन, शर्मिला महर्जन, सिल्भिया राजोपाध्ययं रकम प्रदान यानादिगु खः। अथेहे ज्याझ्वलय् टेलिभिजनया प्रगतिया लागि ज्यापू समाजया अध्यक्ष चन्द्र महर्जन, सल्लाहकारत रामकाजी अबाले, बाबुराजा महर्जन लगायतं भिन्तुना देछानादिगु खः।

 

ज्याझ्वलय् नेपालमण्डलया सल्लाहकारपि संस्थापक दुजःपि शेयरहोल्डर, कर्मचारी पिनिगु उपस्थिति दुगु खः। २०६८ सालया योमरी पून्हि खुन्हू नेवाः समुदायया कला, संस्कृति, भाषा, सभ्यता प्रचार प्रसार यायेगु उद्धेश्यं नेपाःया न्हापांगु आदिवासी टेलिभिजनया रूपय् नेपाल मण्डल टेलिभिजन स्थापना जुगु खः।