कोरोनाया किचलय् सन् २०२० या कासा ख्यः
प्रजित शाक्य | थिंंलागा नवमी ११४१, बिहीवाः २३ गते
![](https://www.lahananews.com/sites/default/files/field/image/maradona.jpg)
कोरोना भाइरसं मुक्कं हलिंयात आक्रान्त याःगुदँ सन् २०२० य् कासा गतिविधि नं ठप्प हे जुल । अझ फुटबल कासाया महान् कासामि डिएगो म्याराडोना व बास्केटबलया व हे स्तरया कासामि कोबे ब्रायन्टया मृत्युं नं थुगु दँ कासाख्यःया नितिं अझ पिडादायी जुल । सन् २०२० या न्हापांगु महिनाय् हेलिकप्टर दुर्घटनाय् बास्केटबलया लिजेन्ड ब्रायन्ट मदुगु अकल्पनीय बुखँ वल । अथेहे कोरोनाया किचलय् लाःगु दँ क्वचाय् हे त्यंकाः म्याराडोनाया नं हृदयघातया हुनिं निधन जुल ।
सन् २०२० यात कष्टकारी दँकथं हे लुमंके माःगु जूगु दु । अथेसां थुगु दँय् हलिंया कासा ख्यलय् छुं भचा लुमंके बहःगु कासा गतिविधि नं जूगु दु । कोरोना महामारीं निराशयाःगु हलिंयात कासा ख्यलं इलय् ब्यलय् खुशीबियाः दुःखया वासः नं जुयाबिल । सन् २०२० य् थथे हे उल्लेख याय् बहजूगु गतिविधियात लिफः स्वय्गु जुइ ।
ओलम्पिक स्थगित
कोभिड १९ महामारीं यानाः न्हापांगु खुसी हलिंयाहे दक्कले तःधंगु खेल मेल ाओलम्पिक स्थगित जुल । अन्तर्राष्ट्रिय ओलम्पिक काउन्सिलं (आइओसी) दच्छि लिपा जक ओलम्पिक याय्गु क्वःछित । हरेक प्यदँ लिपा जुइगु ओलम्पिक आः न्यादँ लिपा जक ग्वसा ग्वइ । ग्रीसया एथेन्सय् सन् १८९६ य् न्हापांगु खुसी ओलम्पिक आयोजना लिपा आःतक्क विश्वयुद्ध बाहेक मेगु हुनिं रद्द जूगु इतिहास मदुनि ।
न्हापांगु विश्वयुद्धया हुनिं सन् १९१६ य् बर्लिन ओलम्पिक व निगुगु विश्वयुद्धं यानाः टोकियो शहरय् हे जुइगु ओलम्पिक रद्द जूगु खः । निगूगु विश्वयुद्धया हुनिं सापोरो शहरं ग्वसा ग्वय् त्यंगु हिउँदे ओलम्पिक व सन् १९४४ य् जुइगु लन्डन ओलम्पिक्स नं मजुल । वहे हुनिं कार्टिना डि एमपेजो हिउँदे ओलम्पिक्स जुइ मफुत । वयां लिपाया ओलम्पिकया स्वंगूगु संस्करणय् छगूनिगू राष्ट्रं बहिष्कार याःगु इतिहास नं दु ।
![](https://www.lahananews.com/sites/default/files/pictures/tokyo%20olympic.jpg)
सन् १९७६ य् मोन्ट्रियल ओलम्पिक्स, सन् १९८० या मस्को ओलम्पिक्स व सन् १९८४ या लस एन्जल्स ओलम्पिक्स राजनीतिक हुनिं छुं राष्ट्रया बहिष्कारय् लाःगु खः । अथे खःसां थ्व स्वंगुलिं हे ओलम्पिक मद्यू । अथेहे सन् २००४ य् एथेन्स ओलम्पिक नं सार्स भाइरसं याना प्रभावित जूगु खः । सन् २०१६ या रियो अोलम्पिक्सय यात नं पतिं पुंकीगु जिका भाइरसं तनाव ब्यूगु खः । तर थ्वनिगु ओलम्पिक नं बांलाक्क हे सञ्चालन जुल ।
थुगुसी जापानं न ओलम्पिक यानां त्वःते धकाः जिद्दि याःगु खः । अथे खःसां कोरोनाया महामारीं जापानं थःगु हठ त्वःतेमाल । आः टोकियो ओलम्पिक्स सन् २०२१ य् जुइगु क्वजी धुंकल ।
म्याराडोना व ब्रायन्ट मदगु दँ
अथेला सन् २०२० य् यक्वहे कासाख्यःया व्यक्तित्वपिं मन्त । लिभरपुलया पूर्व प्रशिक्षक गेरार्ड हाउलियर (७३ दँ), अमेरिकाया ओलम्पिक डिक्थालन च्याम्पियन राफर जोन्सन (८६ दँ), सेनेगलया लिजेन्ड फुटबलर (४२ दँ), इटालीया स्वीमरत फाबियो लोम्बिनी व जियोली रोसेटी (प्लेन दुर्घटनाय्), सन् १९५६ य् मेलवर्न ओलम्पिकय् स्वंगु गोल्ड मेडल त्याकुम्ह अमरिकाया बबी मोरो (८४ दँ), रियल म्याड्रिडया पूर्व नायःलोरेन्जो सान्ज, पोर्चुगलया मोटरसाइक्लिस्ट पाउलो गोन्काल्भेसं (४० दँबलय् डाकर ¥यालीइ ब्वति काय्गु झ्वलय् दुर्घटनाय् लाःगु) संसार त्वःता वन । उपिं मध्ये अप्वः धइथें कोरोना भाइरसया शिकार जूगु खः । अथे खःसां सन् २०२० यात म्याराडोना र ब्रायन्ट मुदगु दँकथं हे लुमंकी धाःसां पाइमखु ।
महान् फुटबलर म्याराडोनाया ६० दँय् निधन जुगु खः । वय्कःया न्ह्यपुइ हि कुंगुलिइ सफल शल्यक्रिया जूगु खःसां वय्कया जीवनवयां लिपा ताःहाकःमजुल । म्याराडोनाया निधनं विश्व हे शोकाकुल जुल । आःतक्क नं करोडौँ फुटबलप्रेमीत म्याराडोनाया जादुमय फुटबलया नशाय् डुबे जुयाच्वंगु दु । थ्व लुमन्ति याकनं हुया वनीगु खने नं मदु । ब्रायन्टया मृत्यु धाःसा अकल्पनीय तरिकां जुल । प्लेन दुर्घटनाय् कोबेजक मखु वय्कःया झिंस्वदँ दुम्ह म्ह्याय् जियानाया नं ज्यान वन । थुगु घटनां नं फुक्कसित अझ मर्माहत यात ।
बायर्न म्युनिखया चमक
कोरोनाया किचलय् नं जर्मनीया च्याम्पियन बायर्न म्युनिखया चर्चा निरन्तर जुयाहे च्वन। बायर्न म्युनिखं फाइनलय् फ्रान्सया पेरिस सेन्ट जर्मनयात बुकाः विश्व फुटबलया दक्कले तःधंगु क्लब फुटबल धेंधें बल्लाः च्याम्पियन्स लिग त्याकल । बायर्न म्यनिख बुन्डेस लिगा, जर्मन सुपर कप व जर्मन कपय् नं च्याम्पियनजुल । बायर्न म्युनिखया स्ट्राइकर रोवर्ट लेवान्डो स्कीयुइएफए पुरुषवर्ष फुटबल घोषित जुल ।
लिभरपुलं नं ३० दँ लिपा इङ्लिस प्रिमियर लिग त्याकेगु गौरव हािसल यात । प्रिमियर लिगयात हलिंया सर्वश्रेष्ठ लिग फुटबल कथं काइ । गौरवशाली इतिहास, तःधंपि कासामि तय्ग जमघट व १९–२० टिम दथुइया धेंधें बल्लाखं फुटबल वृत्तय् प्रिमियर लिगया यक्व हे चर्चा जुइ । हलिमय् दक्कले यक्व प्रशंसक कमेयाःगु लिभरपुल च्याम्पियन जुइ धुंकाः प्रिमियर लिगया चर्चा अझ अप्वः जुल । क्रिस्टियानो रोनाल्डोया टिम युभेन्टसं इटालियन सिरि ए उपाधि रक्षा यात । अथेहे थुगुसीया स्पेनीस लिग रियल म्याड्रिडं त्याकल धाःसा बार्सिलोना उपाधि विहिन जुल ।
लियोनेल मेसी व बार्सिलोना दथुइया विवादं नं थुगु दँय् यक्व चर्चा काल । फ्रान्सय् लिग दथुइ हे बन्दयानाःपेरिस सन्ेट जर्मन (पिएसजी) यात लिग १ च्याम्पियन घोषित यात ।
अथेहे वेम्बली रङ्गशालाय् चेल्सीयात २–१ गोल अन्तरं बुका आर्सनलं फुटबलया दक्कले पुलांगु धेंधें बल्लाः एफएकप त्याकल । इटालीया फरवार्ड सिरो इमोबिल ३५ गोल यानाः युरोपेली
फुटबलय् सन् २०२० या गोल्डेन सु या हकदार जुल । स्पेनया सेभियां इटालीया इन्टर मिलानयात बुकाः युरोपालिग २०२० या उपाधि त्याकल ।
नाडालया कीर्तिमान
राफेल नाडालं फ्रेञ्च ओपन त्याकाः हाकनं छक थःत क्लेकोर्टया जुजु सावित यात । नाडाल झिंस्वकःगु खुसी फ्रेञ्च ओपन च्याम्पियन जूगु खः । थुगुसी फ्रेञ्च ओपन त्याकाः नाडालं दक्कले अप्वः ग्रान्डस्लाम त्याकाः रेकर्ड तःम्ह रोजर फेडररलिसेज्व लिंज्वः यात । नाडालं मेगु ग्रान्डस्लाम मध्ये प्यक्वः अमेरिकी ओपन, निक्वः विम्बल्डन व छकः अस्ट्रेलियन ओपन च्याम्पियन त्याकूगु दु ।
अथेहे नोभाक जोकोभिच अस्ट्रेलियन ओपन, डोमिनिकथिम अमेरिकी ओपन विजेता जुल । थुगुसी जूगु स्वंगू ग्रान्डस्लामया मिसा याकःया खँल्हाय्गु खःसा अमेरिकी सोफिया केनिनं अस्ट्रेलियन ओपन, पोलिस इगा स्वाइटेकं फ्रेञ्च ओपन व जापानया नाओमी ओासकां अमेरिकी ओपन त्याकल । टेनिसया दक्कले प्रतिष्ठित ग्रान्डस्लाम विम्बल्डन धाःसा थुगुसी कोरोना भाइरसं यानाःमजुल ।
मेगु उल्लेखनीय घटनात
सन् २०२० या मेगु लुमंके मा?गु घटनातया खँल्हाय्गु खःसा नर्वेया चेस स्टार म्याग्नस कार्लसनं १११ कासा तक्क अपराजित जुयाः विश्व कीर्तिमान दय्कल । युगान्डाया जोसुआ चेप्टेगेइ नं दस हजार मिटर दौडय् विश्व कीर्तिमान कायम यात । कोरोनाया प्रकोप अप्वयाव ंलिसे विश्व एथलेटिक्स इन्डोर च्याम्पिन्सीप, कोपा अमेरिका, युरो च्याम्पियन्सीप थज्याःगु धेंधें बल्लाः स्थगित जुल । कोरोनाया हे बहानाय् विश्व फुटबलया दक्कलय् प्रतिष्ठित अवार्ड बालन डि ओर आयोजना जुइ मफुत । अथेहे नक्कली पासपोर्ट कान्डय् ब्राजिलया हस्ती फुटबलर रोनाल्डिन्हो नं न्याला पाराग्वेया जेलय् च्वनेमाःगु नं ल्वःमंके मफइगु घटना जुल ।