कर्मचारी भर्ना मयायेत यल महानगरपालिकाया नामय् अदालतया आदेश
लहनान्युज | थिंंलागा षष्ठी ११४१, सोमवाः २० गते
![](https://www.lahananews.com/sites/default/files/yala%20maha.jpg)
उच्च अदालत पाटनं करारय् प्राविधिक कर्मचारी भर्ना कायेगु यल महानगरपालिकाया निर्णय कार्यान्वयनय् रोके याःगु दु। अदालतं महानगरपालिकाया नामय् अन्तरिम आदेश बिउसे कर्मचारी भर्ना मयायेत धाःगु दु। महानगरपालिकां कार्यपालिकाया बहुमत सदस्यपिनिगु निर्णयया भावनायात वान्छ्वया विहीवाः प्रयोगात्मक परीक्षा व अन्र्तवार्ता तय याःगु खः।
अदालतया दक्को प्रक्रिया स्थगित यायेत बुधवाः अन्तरिम आदेश बिःगु दु। उच्च अदालत नियमावली २०७३ या दफा ४२ बमोजिम उगु आदेश बिःगु खः। उगु रिट निवेदनय् स्थानीय सरकार सञ्चालन ऐन २०७४ या दफा ८३ य् उपदफा (८) व (१०) दुगु कानूनी प्रावधान तक आधार माने याना उगु निर्णय रोके यायेत अन्तरिम आदेशया माग याःगु खः। उगु ऐनया उपदफा (८) य् गाउँपालिका व नगरपालिकां नगर प्रहरी, सवारी चालक, कार्यालय सहयोगी, प्लम्बर, इलेक्ट्रिसियन, चौकीदार ,माली, बगैचा व सरसफाई सम्बन्धी पदय् स्थायी पदपूति मयासे प्रतिस्पर्धाया आधारय् सेवा करारय् काये माःग् धका धयातःगु दु।
उगु बाहेक मेगु पद व सेवाय् करार कर्मचारी करारपाखे पदपूर्ति याये मदइग न ऐनय् उल्लेख याना तःगु दु। अथेहे उपदफा १० य् संगठन व व्यवस्थापन सर्र्वेक्षणया प्रतिवेदन नगरसभापाखे पारित याये माः धका धयातःगु दु।कार्यपालिकाया बहुमत सदस्यपिन्सि ध्यानाकर्षण याक याकू न महानगरपालिकाया मेयर चिरिबाबु महर्जन व प्रमुख प्रशासकीय अधिकृत विष्णुप्रसाद कोइरालां कर्मचारी भर्ना यायेगु निर्णय यायेवं उगु निर्णय कानुनसम्मत मजुगु धाःसे गोपाल डंगोलं उच्च अदालतय् मुद्दा दर्ता याःगु खः ।अदालतया आदेश वयेवं महानगरपालिकाया पदपूर्ति समितिं विहीवाः छगु सूचं प्रकाशित यासे पूर्व निर्धारित परीक्षाया दक्को ज्या स्थगित याःगु दु।
वःगु असार ३१ गते छगु विज्ञापन पाखे सिभिल इन्जिनियर खुगु तह, आर्किटेक्ट खगु तह, इलेक्ट्रिकल इन्जिनियर खुगु तह, कम्प्युटर इन्जिनियर खुगु तह, जुनियर इन्जिनिर आर्किटेक्ट न्यागु तह, सिभिल मेकानिक्स न्यागु तह, कम्युटर अपरेटर न्यागु तहया विज्ञापन याःगु खः।अदालत बिःगु अन्तरिम आदेशयात निरन्तरता बिइगु वा मबिइगु सम्बन्धय् सहलह यायेत वइगु पुस २२ गते निगु पक्षयात सतूगु दु । नाप निवेदकया माग दाबी बमोजिम आदेश छाय् जारी जुइम्वाः धका न्ह्यन्हुया दुने लिखित जवाफ पेश यायेत विपक्षीया नामय् अदालतं आदेश बिःगु दु।
Categorized in राष्ट्रिय