प्रम ओली भष्मासुर खः, जसपा अध्यक्ष यादव
लहनान्युज | थिंलागा चतुर्थी ११४१, आइतवाः १९ गते
![](https://www.lahananews.com/sites/default/files/upendra-yadav%20%281%29_0.jpg)
जनता समाजवादी पार्टी (जसपा) या अध्यक्ष उपेन्द्र यादवं प्रधानमन्त्री केपी शर्मा ओलीयात ‘भष्मासुर’ या द्धपः बियादीगु दु। जनताया मत कया जनताया हे अधिकारयात ध्वस्त यायेत स्वःगुलि ओली भष्मासुरया भूमिकाय् खनेदुगु धका यादवं धयादीगु खः।
पार्टी निकट ल्याय्म्ह तयेत प्रशिक्षण यायेगु झ्वलय् जनकपुरधामय् उलेज्या यानादीसे अध्यक्ष यादवं पुराणय् गथे भष्मासुरं बरदान कया भगवान शिवयात भष्म यायेत्यःगु खः अथेहे ओली न जनतानाप मत कया जनतायाहे अधिकारयात ध्वस्त यायेत स्वःगु धका धयादीगु खः। संविधानपाखे जनतां बिःगु अधिकारयात संस्थागत यासे न्ह्यने वने माःगु व संविधानय् दुगु त्रुटियात भिंकेमाःगु जुगुलि अधिकारयात हे डुबे यायेगु ज्या ओलीं याःगु आरोप बिःगु दु।
ओली माक्सवादी, साम्यवादी मखुगु धाःसे अध्यक्ष यादवं वयाःगु ज्या यायेगु पहः महेन्द्रवादी, नश्लवादी व निरंकुशवादी जुगु धका धयादीगु खः। संसद विघटन यासे ओलीं लोकतन्त्र, गणतन्त्र, संघीयता, मौलिक अधिकार समाप्त यासे सर्वसत्तावाद शाषणपाखे वःगु धका धयादीगु दु ।
Categorized in राजनीति