येँ महानगरपालिकाया मेयर विद्यासुन्दर शाक्यं येँं महानगरपालिकां केन्द्रीय कार्यालय दुगु हरिभवनयात बागदरवार खः धका प्रमाणित याना क्यने हाथ्या बियादीगु दु।

भुखाचं क्षतिग्रस्खत हरिभवनयात पुनर्निर्माण यायेत स्वयागु इलय् म्वाः मदुगु विवाद पिकया मुद्दा तयेगु ज्या जुया समस्या वःगु धका मेयर शाक्य धयादीगु खः। वयकलं बालागु ज्या जुयाच्वंगु इलय् अवरोध याइग्ु व व्यवधान खडा याये वलय् थः न्ह्यने वने फइगु धइगु प्रवृत्ति हावी जुगुलि समस्या वःगु धका धयादीसे थज्यागु गलत मानसिकता त्वते फयेकेमाः धका धयादीगु खः।

‘बागदरवार मिइम्ह सुशिल संसेर जबरा न आः न म्वाना च्वंगु दु, बागदरवार प्लटिङ याना मिइम्ह दिलविकास राजभण्डारी आः न म्वाना च्वंगु दु। तर, बागदरबार पिइत्यनागु इलय् मेयरयात कारबाही याये माःगु व मुद्दा तयेगु ज्या जुगु’ शाक्यं दुख प्वकादीगु खः। वयकलं येँ महानगरपालिका सकसिगु निर्णय सर्वसहमत ढंग न्ह्या वयाच्वनागु दु व छु न निर्णय विवादित जुगु मदु धका दावी यानादीगु खः।

वयकलं, ‘जनतापाखे समर्थन दु, बजेटया समस्या मदु। तर, गुवलय् अख्तियार व गुवलय् अदालत वनेमाःगुलि प्रतिवद्धता यानागु कथं ज्याय् ढिला जुगु धका धयादीगु खः। संस्कृति सम्पदा बचे यायेत व सम्पदा निर्माण–पुर्ननिर्माणया लागि आः स्वर्णयुग जुगु दावी तक मेयर शाक्य यानादीगु खः।

थौं येँ महानगरपालिकां ३१ वडा कार्यालयया भवन शिलान्यास यायेगु भल्वलय् वयकलं मूर्त–अमूर्त सम्पदा बचे यायेत व सम्पदा निर्माण–पुर्ननिर्माणया लागि थःगु कार्यकाल स्वर्णयुग जुगु दावी यानादीगु खः । वयकलं सम्पदा संरक्षणया लागि हरेक जात्रा–पर्वयात जिवन्त तयेग दक्को गुठियारनाप समन्वय याना महानगरपालिका न्ह्यने वना च्वनागु दु धका धयादीगु खः।

थुगु झ्वलय् कुमारी जात्रायात निरन्तरता बिइत न्यागु करोडया अक्षयकोष स्थापना यानागु खँ लुमकादीगु खः। आः निर्माण जूगु वडा कार्यालय भवन मेयर वा वडाध्यक्षपिनिगु मखु स्थानीय जनताया हे खः धका मेयर शाक्यं धयादीगु खः। यँे महानगरपालिकाय् निर्वाचित जुया वये धुका यक्को ज्या सम्पन्न ज्ुइ धुकुग दु धका धयादीसे शाक्यं मोनोरेल लगायत छु प्रतिवद्धताया ज्या न्ह्याके मफुगु स्वीकार यानादीगु खः ।

Categorized in राष्ट्रिय