महाकवि गिरिजाप्रसाद जोशीया समालोचना मुना ‘गिरिजाप्रसादया समालोचना’ सफू पितब्वज्या जूगु दु ।

वंगु शनिबाः सक्वय् जूगु ज्याझ्वलय् सफू उलेज्या जूगु खः । कवि राजदास श्रेष्ठ, प्राज्ञ सभाया दुजःध्रुव मधिकर्मी, कुतःपिकाकःया कजि विमल ताम्राकार, कवि नारद बज्राचार्य, बाखंमि ज्ञानीराजा मानन्धर, पत्रकार रत्नकाजि महर्जन, बाखंमि सुरेन्द्रलाल भुजु, ईलोहँ प्रकाशनया कजि नरेशबीर शाक्यं मंकाः कथंया उलेज्या यानादिल ।

ज्याझ्वलय् साहित्यकार ध्रुव मधिकर्मीं नेपालभाषा साहित्यया विकासय् गिरिजाप्रसादं विविध विधाय् च्वसा न्ह्याकाः महत्वपूर्ण योगदान ब्यूगु खँय् बः बियादिल । कवि राजदास श्रेष्ठं गिरिजाप्रसाद बहुमुखी प्रतिभायाधनी खःगु धासें वय्कलं नृत्य, गायनलिसेंया संगीत विधाया विकासय् नं ब्यूगु योगदानयात ल्वःमंके मज्यूगु धयादिल ।

कुतः पिकाकः व सक्व कृषि फार्मया मंकाः ग्वसालय् जूगु ज्याझ्वलय् पिकाकःपाखें साहित्यकार विमल ताम्राकारं महाकवि जोशीया योगदान न्हूगु पुस्तां सीकेबीत वय्कःया बारे च्वया तःगु ‘समालोचकपिनि मिखाय् गिरिजा प्रसाद’ थज्याःगु सफू पिथना वनेगु धयादिल ।

ज्याझ्वलय् नरेशबीर शाक्य, सुरेन्द्रलाल भुजु, नारद बज्राचार्य, ज्ञानीराजा मानन्धर लिसें नं गिरिजाप्रसादया नेपालभाषा साहित्य ख्यलय् योगदानयात कयाः थःथःगु खँ तयादीगु खः । लिसे ंकविपिं धर्मराज राजकर्णिकार, रामेश श्रेष्ठ, प्रकाशमान व लक्ष्मीप्रसाद शाहीलिसें नं हाइकु, कविता लिसें म्ये नं न्यंकादीगु खः ।

सार्वजनिक जूगु सफू ‘गिरिजाप्रसादया समालोचना’ स बाखं, कविता व उपन्यासयात कयाः च्वयातःगु १३ व्यवहारीक, निपु सैद्धान्तिक समालोचना व न्यापु सफूया भूमिका दुथ्याना च्वंगु दु ।

Categorized in राष्ट्रिय