नेवाः न्ह्यलुवापिनि मंकाः वक्तव्य
लहानान्युज | थिंलाथ्व नवमी ११४० पुस ८ बुधवाः
प्रधानमन्त्री केपी ओलीपाखें असंवैधानिक रूपं याःगु संसद विघटनया घटनां यानाः आः संघीय व्यवस्थाया नापनापं धर्म निरपेक्षता व गणतन्त्र समेत खतराय् लायेफु धासें झिंखुम्ह नेवाः न्ह्यलुवातय्सं चिउताः प्वंकूगु दु ।
वय्कःपिंसं म्हिगः छगू मंकाः वक्तव्य जारी यासें संविधानय् उल्लेख हे मदुगु धारा प्रयोग यानाः संसद भंग याःगु कारणं आः थः अनुकूल मजूगु थीथी प्रदेशसभात नं भंग याइगु सम्भावना दुगु खँय् सकलें सतर्क जुइमाः धकाः इनाप यानादीगु दु । थुकिं यानाः संघीय व्यवस्था कमजोर जुइगु व संघीयता कमजोर जुल धाःसा २०६२÷०६३ या आन्दोलनपाखें प्राप्त जूगु गणतन्त्र व धर्म निरपेक्षता थेंज्याःगु सीमित अधिकार नं गुमे जुइ फइगु खतरा दुगु खँ नं वक्तव्यय् धयातःगु दु ।
वर्तमान संविधानय् नेवाः नापं आदिवासी जनजाति, मधेसी, दलित, मिसा, मुस्मां आदि थेंज्याःगु उत्पीडित समुदायं माग याना वयाच्वंगु समानताया बुँदा दुमथ्याकूगु कारणं थज्याःगु संवैधानिक दुर्घटनात जुयाच्वंगु खँय् सकलें राजनीतिक पार्टीतय् ध्यानाकर्षण यासें आः सडक संघर्ष व अदालती लडाइँपाखें संसद पुनस्र्थापना यायेधुंकाः संविधान संशोधन यानाः नेवाः लगायतया सम्पूर्ण उत्पीडित जाति, वर्ग व समुदायतय्सं ताःइलंनिसें धया वयाच्वंगु मागयात सम्बोधन यासें दुथ्याकेत नं इनाप यानादीगु दु ।
अथे हे वक्तव्यय् यदि आः संसद पुनस्र्थापना मजुल धाःसा उकिया लिच्वः कथं देशय् तःधंगु अस्थिरता व अराजकता समेत ब्वलनीगु खतरा दुगु खँय् नं सतर्क यानातःगु दु ।
नेवाः न्ह्यलुवातय्सं पिकाःगु उगु मंकाः वक्तव्यय् दुर्गालाल श्रेष्ठ, हितकर वीर सिं कंसकार, मल्ल के. सुन्दर, राजेन्द्र श्रेष्ठ, हिसिला यमि, डा. महेशमान श्रेष्ठ, डा. विजय सैंजु, डा. पुष्पराज राजकर्णिकार, नरेश ताम्रकार, नरेन्द्र हाडा, तिर्थराम महर्जन, दिलीप महर्जन, डा. चुन्दा वज्राचार्य, प्रा. प्रेमशान्ति तुलाधर, त्रिरत्न शाक्य व चन्द्र महर्जनं ल्हाःचिं तयादीगु दु ।
थ्वहे झ्वलय् अप्रत्याशित रूपं संसद विघटनया घटनापाखें नेवाः आन्दोलनयात छु गज्याःगु लिच्वः लाइ धइगु खँय् सहलह यायेत कन्हय् शुक्रवाः छगू नेवाः भेला नं याइगु ग्वसाः दु । थनया नेपाः ब्यांक्वेटय् न्हिनय् १ बजे उगु नेवाः भेला यायेत्यंगु खः । संसद विघटनप्रति चिउताः प्वंकुसें वक्तव्य जारी यानादीपिं थ्वहे नेवाः न्ह्यलुवापिनिगु पहलय् स्वतन्त्र रुपं कन्हय्या भेला यायेत्यंगु खँ सीदुगु दु । भेलाय् नेवाः आन्दोलनया सक्रिय न्ह्यलुवापिंसं संसद विघटनपाखें नेवाःतय्त लाये फइगु लिच्वःयात कयाः बिचाः तयादीगु खँ सीदुगु दु ।
Categorized in राष्ट्रिय
