येँ महानगरपालिकां त्रिवि शिक्षण अस्पतालयात अत्याधुनिक सीटी क्यान मिसिन खरीदया लागि आर्थिक अनुदान बिइगु जूगु दु।

उपप्रधानमन्त्री ईश्वर पोखरेलया उपस्थितिइ येँ महानगरपालिकाया मेयर विद्यासुन्दर शाक्य व त्रिवि शिक्षण अस्पतालया कार्यकारी निर्देशक प्राडा दिनेश काफ्ले दथुइ सम्झौतापत्रय् ल्हाचिं तयादीगु खः। स्पेसिफिकेशन बमोजिम ७ करोड ५० लाख रुपैयाँ बराबरया १२८ स्लाइसया अत्याधुनिक सिटी स्क्यान मेसिन न्यायेगु धका अस्पतालं जानकारी बिःगु दु।

अस्पतालया कथं आः न्याइगु मेसिनपाखे उच्च गुणस्तीयर व परिस्कृत रिपोर्ट वइगु नाप सर्वसुलभ सेवा बिइ फइ धका धाःगु दु। ल्हाचिं तये धुका उपप्रधानमन्त्री पोखरेलं संमृद्ध नेपाल खुशी नेपालीया नारायात पूरा यायेगु कथं स्वास्थ्य, शिक्षा, कृषि, पर्यटन महत्वपूर्ण खः धासे साझेदारीया हिसावं महानगरपालिका थ्व बालागु ज्या खः धका धयादीगु खः।

उगु ज्याझ्वलय् न्ववानादीसे मेयर शाक्यं येँ महानगरपालिकां स्वास्थ्य क्षेत्रय् नेपाल सरकार व प्रदेश सरकारया क्षेत्र दुने न थीथी निकाय नाप सहकार्य याना ज्या न्ह्याका वयाच्वनागु दु धका धयादीगु खः। ‘येँ महानगरपालिका संघीय राजधानीया पालिका खः। महानगर दुने राष्ट्रियस्तरया सरकारी अस्पताल जिमिगु क्षेत्राधिकार दुने मदु,’ मेयर शाक्यं ‘उकिया लागि मेगु स्थानीय तह न थे जिमिगु क्षेत्राधिकार दुने अस्पताल धाये फुगु अवस्था मदु । वीर अस्पताल, टिचिङ अस्पताल, टेकु अस्पताल, सिभिल अस्पताल दक्को येँ महानगर दुने दु तर जिमिगु क्षेत्राधिकार दुने मदु।’ मेयर शाक्यं आः महानगरपालिका जक करीब ३५ हजारया स्वाब संकलन याये धुकागु जानकारी बिःगु दु। दक्को राष्ट्रियस्तरया अस्पताल दुगु थन वडाध्यक्ष व महानगरपालिकां थःगु अस्पताल धाये फुगु अवस्था मदुगु धका धयादिगु दु।

ज्याझ्वलय् मेयर शाक्यं महानगरपालिका नाप भगिनी सम्वन्ध स्थापित विदेशया थीथी नगरपाखे कोभिड नियन्त्रण व रोकथामया लागि उपलब्ध याकूगु स्वास्थ्य सामाग्री थ्व स्वया न्ह्यः वीर अस्पताल, कान्तिवाल अस्पताल  व थापाथली स्थित परोपकार प्रसूति तथा स्त्री रोग अस्पतालयात हस्तान्तरण याये धुन धइगु जानकारी बियादीगु खः।  ‘कोरोना परीक्षणया लागि उगु अस्पतालयात पीसीआर मेसिन नाप अत्यावश्यक सामग्री हस्तान्तरण याये धुकागु धका धयादीगु खः,’ वयकलं, ‘सहिद गंगाल अस्पताल, छाउनी च्वंगु विरेन्द्र सैनिक अस्पताल, कान्तिबाल अस्पतालय् जिमिसं सेवा विस्तारया लागि थीथी ज्याया सहकार्य यानागु दु।

जिमिसं जनस्तरपाखे सञ्चालितअस्पतालनाप न सहकार्य याना वयाच्वागु दु ।’मेयर शाक्य येँ दुने क्षत्रपाटी निःशुल्क चिकित्सालययात न्हगु भवनय् लिफ्ट जडानया लागि ३० लाख बियागु व न्हुगु भवन निर्माणया लागि न्याःगु करोड बिइगु प्रतिवद्धता याये धुकागु दु धका जानकारी बियादीगु खः।

त्रिवि चिकित्साशास्त्र अध्ययन संस्थान (आइओएम) या डिन प्राडा. दिव्या सिंह शाह न आधुनिक चिकित्सा विज्ञानय् सिटी स्क्यान मदेक मगाःगु हतियार खः धासे येँ महानगरपाखे याःगु थ्व तधःगु ग्वाहालि खः धका धयादीगु खः।

Categorized in राष्ट्रिय