यल महानगरं स्कूल चायेकेगु अनुमति बिल
शोभा श्रेष्ठ | कछलागा नवमी ११४१, मंसिर २४ बुधवाः
यल महानगरपालिकां महानगर दुने ब्बने कुथि चायेकेगु निर्णय याःगु दु। महानगरया मेयर चिरीबाबु महर्जनया अध्यक्षताय् मंगलवाः च्वंगु नगर शिक्षा समितिया बैठकं स्कूल चायेके बिइगु अनुमति बिःगु दु।
स्कूलया विद्यालय व्यवस्थापन समिति, अभिभावक शिक्षक समिति, वडा कार्यालय नाप समन्वय याना स्कूल चायेके दइगु निर्णय याःगु दु। स्कूलया भौतिक पूर्वाधार, विद्यार्थी ल्याः समान मदु, थ्व दक्को खँ मिलेयाना स्कूल गुवलय् निसे चायेकेगु व गये याना सञ्चालन यायेगु निर्णय व्यवस्थापन समितियात जिम्मा बियागु धका मेयर महर्जन धाःगु दु।
स्कूल सञ्चालन यायेगु यलय् नेपाल सरकारं जारी याःगु स्वास्थ्य मापदण्ड व स्कूल सञ्चालन कार्यविधि अपने यायेत निर्देशन बिउसे सामुदायिक स्कूलयात माःगु सावः, लः व मास्क महानगरपालिकां उपलब्ध याकेगु प्रतिबद्धता व्यक्त याःगु दु ।
स्वास्थ्य विज्ञपि नाप महानगरं स्कूल सञ्चालनया अवस्था सिइकेत अनुगमन तक यायेगु निर्णय याःगु दु।
यल महानगरय् सामुदायिक व संस्थागत याना निसः व न्यय्गु स्कूल दु । उकि मध्ये ४० गु सामुदायिक स्कूल दु।
Categorized in राष्ट्रिय
