येँया सम्पदा व पोखराया प्रकृतियात पर्यटन नाप स्वाना देय् समृद्ध दय्के फइ : मेयर शाक्य
लहानान्युज | कछलागा पारु ११४१, मंसिर १६ मंगलवाः
![](https://www.lahananews.com/sites/default/files/mpokhara.jpg)
येँ महानगरपालिकाया मेयर विद्यासुन्दर शाक्यं नेपालया अर्थतन्त्र याःगु मेरुदण्डया रुपय् पर्यटन क्षेत्रया माध्यमपाखे अर्थतन्त्रयात समृद्घ दयेके फइ धका धयादीगु दु। येँ महानगरपालिका व रामग्राम नगरपालिका दथुइ अन्तर स्थानिय तह भगिनी सम्वन्ध स्थापना जुगु ज्याझ्वलय् ब्वति कायेत वया अध्ययन भ्रमणया झ्वलय् पोखराय् मेयर शाक्ययात लसकुस यासे पोखरा महानगरपालिकाय् छगु ज्याझ्वलय अथे धयादीगु खः।
सम्वोधन यायेगु झ्वलय् मेयर शाक्यं पर्यटनया माध्यमपाखे देय्या अर्थतन्त्रयात थकायेत समन्वय व अनुभव आदान–प्रदान आवश्यक दु धका धयादीसे, येँ दुगु सम्पदायाना येँ छगु सांस्कृतिक सहर जुगु दु। येँ महानगरं मुर्त–अमुर्त सम्पदां बालगु दु धका धयादीसे,’ मेयर शाक्यं, ‘पोखरा प्रकृतिया सुन्दरताया धनी खः। थुगु निगु महानगर दथुइ प्रकृति व सम्पदाया प्रवद्र्धन व व्यवस्थापन याये फत धाःसा कोरोनाया कारण शिथिल जुया च्वंगु पर्यटनयात चलायमान दय्का पर्यटनया हे माध्यमपाखे देय्या अर्थतन्त्रयात थकाय् फइ धका धयादीगु खः।’
न्ववायेगु झ्वलय् मेयर शाक्यं कोभिड–१९ नियन्त्रण व रोकथामया लागि येँ महानगरपालिकां याःगु कुतः, सहरी सुव्यवस्थाया लागि तःगु पलाः व सम्पदा निर्माण–पुर्ननिर्माण, भौतिक पूर्वाधार लगायतया सन्र्दभय् याःगु ज्याया खँ कनादीगु खः।
ज्याझ्वलय् न्ववानादीसे पोखरा महानगरया मेयर मानबहादुर जिसीं येँ महानगरपालिका संघीय राजधानीयो महानगरपालिका जूगुलि यक्को खँ येँ महानगरपाखे सय्के फइगु जुगुलि अभिभावकीय भूमिका जुइ माःगुलि बःबियादीगु खः। आः स्थानीय तहया भूमिकायात कमजोर दयेकिगु कुतः जुयाच्वंगु धका धयादीसे संघीयतायात संस्थागत यायेत स्थानीय तहया भूमिका महत्वपूर्ण जुइ माःगुलि बःबियादीगु खः। ‘स्थानीय तहया भूमिकाया बलाकेत येँ महानगरपालिकां नेतृत्व कायेमाः,’धका मेयर जिसी धयादीगु खः।,
येँ महानगरपालिकाया उपमेयर हरिप्रभा खड्गी श्रेष्ठ न उगु ज्याझ्वलय् उपस्थिति दुगु खः।
Categorized in राष्ट्रिय