थौनिसे स्वाब संकलनया लागि मोवाइल भ्यान सञ्चालनय् हःगु दु
नृपेन्द्रलाल श्रेष्ठ | कछलाथ्व अष्टमी ११४१, मंसिर ७ आइतवाः
![](https://www.lahananews.com/sites/default/files/mya.jpg)
येँ महानगरपालिकां थौनिसे स्वाब संकलनया लागि मोवाइल भ्यान सञ्चालनय् हःगु दु।
महानगरं उपलब्ध याकूगु सवारी साधनय् नेपाल बिज्ञान तथा प्रबिधि प्रज्ञा प्रतिष्ठानं पोजेटिभ एअर प्रेसर मेन्टेन्ड कक्ष जडान यासे महानगरयात हस्तान्तरण यायेवं उगु भ्यान सञ्चालनय् हःगु खः। थौं राष्ट्रिय सभा गृहय् ग्वसाः ग्वःगु ज्याझ्वलय् प्रतिष्ठानया सचिव डा. महेशकुमार अधिकारीं महानगरया मेयर बिद्यासुन्दर शाक्ययात उगु भ्यान हस्तान्तरण याःगु खः।
कोभिड १९ महामारी रोकथाम, नियन्त्रण व उपचार ज्यायात अझ यक्को प्रभावकारी यायेत महानगरपालिकां मोवाइल भ्यानपाखे स्वाब संकलन सुरु यायेगु महानगरया मेयर शाक्यं धयादिसे प्रतिष्ठानया बैज्ञानिक तथा प्राविधिक अनुसन्धान केन्द्रपाखें डिजाइन व परीक्षण याना तयारी अवस्थाय् दुगु मोवाइल स्वाब कलेक्सन बुथ हस्तान्तरण ज्याझ्वः लिपा न्ववासे महानगरया मेयर शाक्यं लकडाउनया सुरुनिसें हें कोभिड १९ महामारी रोकथाम, नियन्त्रण व उपचार ज्यायात प्रभावकारी यायेत ज्या याना वया च्वनागु धका धयादिसे महानगरलिसें दुगु म्हो जनशक्तिपाखें नं प्रभावकारी ज्या न्ह्याका च्वना वयाच्वनागु खः।
मेयर शाक्य थुगु भ्यानमार्फत अशक्त, अपाङ्गता जुपिं, दीर्घ ल्वःगि व जेष्ठ नागरिकन्त लक्षित याना सेवा बिइगु धका धयादिगु खः। वयकलं ज्याझ्वलय् कोरोनायात हेलचेक्राई मयायेत नं सुझाव बियादिसे नेपाल सरकारं क्वःछिनातगु मापदण्ड दुने च्वना नागरिकया निःशुल्क परिक्षण यायेत महानगरपालिका तयार दुगु खँ कनादिसे लक्षित वर्गयात उपचारपाखें बञ्चित मयायेगु झिगु अभियानयात साथ बिया फया फतलें असहाय, विपन्न व जेष्ठ नागरिकयात प्राथमिकता बिया व फुपिन्सं थःहे परिक्षण यायेत नं इनाप यानादिगु दु।
वयकलं कन्ट्याक ट्रेसिङय् लापिन्त नं निःशुल्क उपचार यायेगु धका धयादिसे संक्रमण ल्याः म्हो याना यका फुक्कसित फयाफतलें स्वास्थ्य मापदण्डया पालना यायेत नं इनाप यानादिगु दु।
उगु ज्याझ्वलय् उपमेयर हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, शहरी योजना आयोगया उपाध्यक्ष सरोज बस्नेत, नास्टया प्रबिधि संकाय प्रमुख डा. रविन्द्रप्रसाद ढकालसहित अधिकारीपिनिगु उपस्थिति दुगु खः।