नेपालसम्बत देय्या मौलिक सम्बत : शहरी विकासमन्त्री श्रेष्ठ
लहानान्युज | कछलाथ्व पंचमी ११४१, मंसिर ४ बिहीवाः
![](https://www.lahananews.com/sites/default/files/thimi_1.jpg)
शहरी विकासमन्त्री कृष्णगोपाल श्रेष्ठं नेपाल सम्बतयात नेपालय् न्हुगु सम्बतया रुपय् थालनी याये माःगु धका धयादिगु दु।
नेपाल सम्बत ११४१ या लसताय् मध्यपुर थिमीइ राष्ट्रिय विभुति शंखधर साख्वाःया झ्वाताय् माल्यापर्ण यानादिसे वयकल नेपालय् थःगु हे सम्बतया रुपय् नेपाल सम्बत् छ्यलेमाः धका धयादिगु खः। दक्को जाति व भाषाभाषिया अपनत्व जुइ कथं नेपाल सम्बतया प्रचलनय् हयेमाःगु बिचाः तयादिगु खः।
नेपाल स्म्बतयात नेपाःया कामकाजय् न छ्यले माः धका धयादिगु खः। शंखधर साख्वाःयात राष्ट्रिय विभुति घोषणा याये वःनिसे टिकट प्रकासन यायेगु नेपाल भाषा उत्थान नेपाल सम्बत माने यायेगुलि महत्वपुर्ण भुमिका म्हितिम्ह पु्र्वमन्त्री नाप मानव अधिकारवादी नेता मदुम्ह पद्मरत्न तुलाधरया योगदानया चर्चा यानादीसे मन्त्री श्रेष्ठं वयकःया लुमति सरकारं रत्नपार्कय् झ्वाता तयेगु तयारी यानावया च्वनागु दु धका धयादिगु खः।
नेपाल सम्बत व न्हुदया भिन्तुना हरेक ज्याझ्वलय् न्ह्यने खने दइम्ह नेता तुलाधरया योगदानयात सुनानं ल्वमंके फइ मखु धका धयादिगु खः।
अथे ज्याझ्वलय् पुर्वमन्त्री नाप नेपाली काग्रेसया सांसद भीमसेनदास प्रधान, पुर्वमन्त्री नाप सांसद महेश बस्नेत, मध्यपुर थिमि नगरपालिकाया मेयर मदनसुन्दर श्रेष्ठ, प्रतिष्ठानया अध्यक्ष चन्दनकृष्ण श्रेष्ठ, उपाध्यक्ष ज्ञानराम श्रेष्ठपिन्स थःथःगु खँ तयादिगु खः।
Categorized in राष्ट्रिय