निर्देशक जूपिं हिरोइन
![](https://www.lahananews.com/sites/default/files/field/image/misa-director.jpg)
- विजयरत्न असंबरे
“तीतो सत्य” थेंजाःगु तसकं हे लोकंह्वाःगु टेलिसिरियलया मू पात्र व निर्माण पुचःया छम्ह मू मनू अले “संगीनी” व “गाउँले” नांयागु संकिपाय् हिरोइन जुइधुंकूम्ह दिपाश्री निरौलां संकिपा निर्देशनय् ल्हाः तःबलय् आपासिनं पत्याः मयाःगु खः । तर वय्कः मय्जुं दयेकूगु “छक्का पञ्जा” आःतकया दक्वः रेकर्डयात माथ यानाः न्हूगु रेकर्ड तयाक्यंबलय् सकसिया म्हुतु प्वाः त्यूगु खः । मखु धइगु खःसा हिरोइनतय्सं निर्देशनय् पलाः न्ह्याकूगु उलि ताःलागु मदुनि ।
रेखा थापा नेपाःया छम्ह नांजाःम्ह हिरोइन खः । आःतक नं नम्बर वन पोजिशनय् हे लानाच्वंगु दनि । रेखां “हिम्मतवाली” दयेकेगु ज्या न्ह्याकल । श्याम भट्टराई नांयाम्ह निर्देशकयात निर्देशनया जिम्मा बिल । शुटिङ्गया नितिं नेपालगञ्जय् वन ।
अन रेखा व श्याम भट्टराई दथुइ कचवं शुरु जुल । बांमलाक्क हे कचवं जूबलय् श्याम भट्टराईयात संकिपापाखें लिकाना हल । अले थःम्हेसिनं हे निर्देशनया भाला क्वबिल । थुकथं रेखा थापा डाईरक्टर जुल । आः हाकनं मेगु संकिपायाा निर्देशनय् ल्हाः तइ वा मतइ धइुगु खँ धाःसा आःतक छुं पिहांवःगु मदुनि ।
रेखा थापाथें तुं आकाझाकां निर्देशनय् ल्हाः तःम्ह हिरोइन छम्ह सिर्जना बस्नेत नं खः । हिरोइनया रुपय् सिर्जना उलि डिमाण्डय् मदुम्ह हिरोइन खः । बाज्यः वनेधुंकूम्ह हिरोइन खः ।
वय्कः मय्जुं नं “गुडलक” नांयागु छगू संकिपाय् लाय् तल । थःम्हेसिनं हे लाय् तःगु संकिपाय् थःहे हिरोइन जुइगु धइगु अजुचायापूगु खँ नं मखु । “गुडलक”या शुटिंग नं स्वनिगलं पिने हे न्ह्याःगु खः । थ्व संकिपा गोविन्द गौतम नांयाम्ह डाइरेक्टरं निर्देशन याइगु क्वःजित । तर शुटिंग शुरु जुइ न्ह्यः हे बलिउडपाखे स्वयावंम्ह गोविन्द गौतम उजुसुजुं लिहां मवःबलय् हारेचायाः निर्देशनया भाला सिर्जना मय्जुं क्वबिल ।
![](http://www.lahananews.com/sites/default/files/pictures/karishma-mm.jpg)
थुकथं नेपाःया संकिपा ख्यलय् हिरोइनं डाइरेक्टर जूम्ह न्हापांम्ह सिर्जना बस्नेत हे खः । व स्वयां लिपा जक रेखा थापाया “हिम्मतवाली” शुरु जूगु खः । खय्तला रेखा थापा व सिर्जना बस्नेतपिं स्वयां न्हापा करिश्मा मानन्धर मय्जुं संकिपा निर्देशन याइगु खँ पिहांवःगु खः । नेपाःया नांजाःम्ह संकिपा बन्जाः उद्धव पौड्यालया छगू संकिपा करिश्मां निर्देशन याइगु पक्कापक्की जूगु खः । तर संकिपा धाःसा मदयेकू ।
नेपालय् संकिपा निर्देशनय् पलाः न्ह्याकूपिं वा न्ह्याकेत्यंपिं हिरोइन धइपिं थुलिजक मखु, मेपिं नं दु । दँबदँ न्ह्यः रञ्जु लामिछाने नांयाम्ह छम्ह हिरोइन मय्जुं नं संकिपा निर्देशन याइगु खँ पिहांवःगु खः । लील बहादुर क्षेत्रीया उपन्यासय् दयेकूगु “बसाईं” संकिपाय् डेब्यु याःम्ह रञ्जुयात उगु संकिपाया नितिं नेफ्टा फिल्म अवार्डय् बेस्ट डेब्यु एक्टर (फिमेल)या अवार्ड नं वःगु खः । लिपा छगू सिरीयलय् बिदिशा नांयाम्ह नेगेटिभ पात्र जुयाः म्हितूबलय् नं वयागु तारीफ हे जूगु खः ।
नेपालं पिनें वःम्ह रञ्जु अनं लिपा “तितोसत्य” सिरीयलय् स्वीति नांयाम्ह मिसा जुयाः कमेडी रोल यानाः स्वकुमितय्गु नुगलय् च्वंगु खः । तर अनं लिपा तन । निर्देशक जुइगु धइगु खँ नं तन । निर्देशक जुइगु नितिं हे रञ्जु मय्जुं “फिल्म डाइरेक्टर्स गिल्ड अफ नेपाल”या ग्वसालय् प्यदँति न्ह्यः जूगु “इन्टरनेशनल वर्कसप अन फिल्म मेकिङ्ग”य् ब्वति नं काल । तर वय्कः मय्जुं थुखेपाखे पलाः न्ह्याकूगु धाःसा खने मदुनि ।
संकिपा निर्देशनय् पलाः न्ह्याकूपिं हिरोइनतय्गु चर्चा यायेबलय् त्वःफिके मज्यूगु नां धइगु चैत्य देवी व गौरी मल्ल नं खः । चैत्य देवी धइम्ह नेपाःया न्हापांगु संकिपा धयातःगु “आमा” संकिपाय् मेन रोल म्हितूम्ह हिरोइन खःसा वय्कः मय्जुं लिपा वनाः “जीवन रेखा” नांयागु संकिपाय् डाइरेक्टर प्रकाश थापालिसे एसिस्टेंट डाइरेक्टर जुयाः ज्या याःगु खः । तर वय्कःया पलाः एसिस्टेण्ट स्वयांं च्वय् न्ह्यायेमफुत ।
धिसिलाःगु अभिनयया नितिं नांजाःम्ह गौरी मल्लया पलाः नं अथेहे जुल । गौरी मल्लं नं छगूबागू संकिपाय् प्रकाश थापालिसे एसिस्टेंट याःगु खँ दु । अले वय्कःया पलाः नं एसिस्टेण्टय् जक हे लिकुन । व स्वयांं अप्वः मन्ह्यात ।
![](http://www.lahananews.com/sites/default/files/pictures/misa-highlight.jpg)
आः वयाः नेपाःया संकिपा ख्यलय् मेम्ह छम्ह हिरोइन झरना थापां नं निर्देशकया रुपय् थःगु पलाः न्ह्याकूगु दु । वय्कः मय्जुं निर्देशनय् डेब्यु याःगु संकिपाया नां “ए मेरो हजुर २” खः । छुं ई न्ह्यःतक थ्व संकिपा दयेकीगु सम्भावना म्हो जक दूगु खः । छाय्धाःसा थ्व संकिपाया न्हापांगु ब्वय् श्रीकृष्ण श्रेष्ठ हिरो जुयाः म्हितूगु खः । संकिपा सुपरहिट नं जूगु खः । अले थ्वहे संकिपाया सिक्वेलकथं दयेकेत्यंगु “ए मेरो हजुर २” संकिपाय् नं श्रीकृष्ण श्रेष्ठयात हे हिरो कायेगु ग्वसाः झरना मय्जुं ग्वःगु खः ।
तर श्रीकृष्ण श्रेष्ठं मत्यवं थ्व संसार त्वःतावंबलय् थ्व संकिपाया ग्वसाः ताःमलाइगु सम्भावना ब्वलंगु खः । तर लिपा स्क्रिप्ट हे हिलाः मेकथंया स्क्रिप्ट च्वयाः न्हूकथं हे संकिपा दयेकेगु ज्या शुरु याःगु खः । खय्तला झरना मय्जुं न्हापा “केटी हराएको सूचना” नांयागु संकिपा निर्देशन याइगु धकाः नं खँ पिहांवःगु खः । तर लिपा व प्रोजेक्ट हे दित । तर आः वयाः “ए मेरो हजूर २” या शुटिंग हे क्वचायेधुंकूगु दु । आः वयाः निर्देशक ऋषि लामिछानेया तिरी मय्जु सरिता लामिछाने नं संकिपा निर्देशनय् पलाः न्ह्याकीगु खँ पिहां वयाच्वंगु दु ।
![](http://www.lahananews.com/sites/default/files/pictures/bijay-ratna.jpg)