खुला थासय् जा नकेयेगु थौनिसे बन्द
लहानान्युज | कछलाथ्व दुतिया ११४१, मंसिर २ मंगलवाः
![](https://www.lahananews.com/sites/default/files/lahanan%20medai_0.jpg)
थौं मङ्गलवाः निसे खुला थासय् जा नकेयेगु बन्द जुइ त्यःगु दु। येँया खुलामञ्च व सार्वजनिक थासय् निःशुल्क भोजन सेवा सञ्चालन मजुइगु दु।
स्वास्थ्य चुनौती व कोरोना सङ्क्रमण फैलै जुइगु जोखिमया कारण खुला थासय् जा नकेयेगु बन्द यासे आः संरचना दुने स्वास्थ्य मापदण्डया पालना यासे सञ्चालन याये त्यःगु खः। येँ महानगरपालिका व भोजन सेवा सञ्चालन याना च्वपि संस्था दथुइ व्यवस्थित रूपं सेवा सञ्चालन यायेग् थ्व स्वया न्ह्यः सहमति जुगु खः।
उगु सहमति कथं थौंनिसे भोजन याकेत वडा व महानगरया दथुइ समन्वयया व्यवस्था यायेगु व खुलामञ्च लगायत सार्वजनिक थासय् निःशुल्क भोजन नकिइ मखू। असहाय, अशक्त व शारीरिक रूपं ज्या याये मफुपिन्त मानव सेवा आश्रममा नकेयेगु च्वनेयेगु व स्वास्थ्य उपचारया प्रबन्ध यागु दु सा नाप माःगु समन्वयया लागि न्ह्यनेगु वडा कार्यालय वा तपिक आश्रमय् सम्पर्क यायेत येँ महानगरपालिकां इनाप याःगु दु। मानव सेवा आश्रम येँ महानगरपालिकाया सहकार्यमा सञ्चालित जुयाच्वंगु खः।
येँ महानगरपालिकां दक्को सामाजिक सङ्घ संस्थायात बन्द संरचना दुने सेवा सञ्चालन यायेत इनाप याःगु खः। उकिया लागि महानगरपालिका व वडा कार्यालयपाखे माःगु समन्वय व ग्वाहालि यायेगु धका महानगरपालिकाया मेयर विद्यासुन्दर शाक्यं धयादिगु दु ।
Categorized in राष्ट्रिय