कोभिडया कारण बेरोजगार जुपिन्स महानगर स्वापु तयेत इनाय
लहानान्युज | कौलागा त्रयोदशी ११४०, २८ गते शुक्रवाः
येँ महानगरपालिकां कोभिड १९ या कारण बेरोजगारजूपिन्त रोजगारीया लागि थः च्वनाच्वनागु थासय् या वडा ज्याकुथिइ स्वापू तयेत इनाप याःगु दु।
महानगरपालिकां थौं छगु सार्वजनिक सुचं पिकया रोजगारी गुमेजूपिन्त श्रम यायेफुपिं महानगरवासीपिन्त जीवन निर्वाहया नितिं पारिश्रमिक कार्यविधि २०७७ कथं रोजगारी बिइगु जानकारी बिगु खः । महानगरं असहाय, अशक्त व शारीरिक रुपं ज्या यायेमफुपिन्त धाःसा नयेत, च्वनेत व स्वास्थ्य उपचारया नितिं मानव सेवा आश्रमय् व्यवस्था याना तयागु दु धका महानगरपालिकां जानकारी बिःगु दु ।
थज्यापि मनूतयसें थःगु लिक्क च्वंगु वडा ज्याकुथिइ वा तप्यंक मानव सेवा आश्रमय् स्वापू तयेफइगु महानगरपालिकां सार्वजनिक याःगु सुचं दुने न्ह्यथनातःगु दु । थ्वसिबें न्ह्यः परोपकारी छुं संस्थातसें येँया तिंख्यलय् बेरोजगार, असहाय व अशक्त मनूतय्गु नितिं जा नकेगु ज्या यानाः वयाच्वंगु खः।
स्वास्थ्य जोखिम, संक्रमणया सम्भावना, सामाजिक प्रतिष्ठा व मानव अधिकार संरक्षण यायेगु धासें महानगरपालिकां वइगु मंसीर २ गतेनिसें सार्वजनिक थासय् जा नकेगु ज्याय् रोके याये त्यःगु खः। स्वास्थ्य मापदण्ड पालना यानाः भोजन सेवा संचालन यायेत महानगरपालिकां फुक्क सामाजिक संघ संस्थायात इनाप न याःगु दु ।
थुगु ज्याय् वडा ज्याकुथिपाखें माःगु समन्वय व ग्वाहालि जुइगु येँ महानगरपालिकां जानकारी ब्यूगु दु ।
