निःशुल्क जा नकाच्वपिन्त लिना छ्वये मखु व्यवस्थापन याये त्यनागु खः मेयर शाक्य
नृपेन्द्रलाल श्रेष्ठ | कौलागा षष्ठी ११४०,कार्तिक २१ शुक्रवाः
![](https://www.lahananews.com/sites/default/files/maa1.jpg)
येँ महानगर दुने थीथी थासय् सार्वजनिक व हुलमुल जुइगु थासय् निःशुल्क जा नकाच्वंगु आः स्वन्ति लिपा बन्द जुइ धका धाःगु दु। येँ महानगरपालिका व निःशुल्क नकाच्वपि नाप थीथी संघसंस्थाया प्रतिनिधि दथुइ थौं सहलह यासे सहमति जूगु दु।
लकडाउन लिपा खुलामञ्चय्् जा नका च्वंगु खःसा कोभिड–१९ संक्रमण झन अप्वोगु, स्वास्थ्यवद्र्धक वातावरण कायम मजुगु व सामाजिक प्रतिष्ठाय् तक आँच मवइगु कथं ध्यानय् तया महानगरपालिका व जा नकाच्वपिं संघ–संस्थां जा नकेइगु वैकल्पिक थाय् मालेयेगुलि सहमति जूगु दु।
सहमति कथं खुलामञ्च लगायतया थाय् जा नका वयाच्वगुलि किजापूजा लिपा मालेयेगु धका धाःगु दु। ‘खुल्लामञ्च लगायतया सार्वजनिक थाय् जा नकेयेगु बन्द याना संरचना दुने प्रवन्ध मिले यायेगु,’ सहमतिपत्रय् धया तःगु दु,’ थुकिया लागि जा नका वयाच्वंगु संघ–संस्था व अभियन्तापिन्स २०७७ या किजापूजा लिपा बैकल्पिक व्यवस्था यायेगु धका महानगरपालिका व सम्वद्ध वडाया समन्वयय् माःगु व्यवस्था मिले यायेगु धका धाःगु दु।’
उगु सम्झौतापत्रय् जिमिगु टिम नेपाल, मानवी क्रियटिभ एशोसियशन, लायन्स क्लव अफ काठमाडौँ न्यु ग्रिन सिटी, हाम्रो सानो प्रयास, हाम्रो सानो टिम नेपाल, गसिव क्वीन नेपाल, १०० ग्रुप लगयतया प्रतिनिधिपिन्स हस्ताक्षर याःगु खः।
![](https://www.lahananews.com/sites/default/files/pictures/mm1_0.jpg)
येँ महानगरपालिकाया मेयर विद्यासुन्दर शाक्यं येँ महानगरपालिका मानवीय सेवाया निरन्तर लगे जुयाच्वंगु स्मरण याकादिगु खः। येँ महानगरपालिकाया आर्थिक ग्वाहालिं निर्माण जुइ त्यःगु मानव सेवा आश्रम भवनया प्रारम्भिक चरणया सहलह ज्याझ्वलय् सम्वोधन यासे अथे धयादिगु खः। ‘नये मखंपि, बेरोजगार, अशक्त व असहाय जूपिनिगु सू मदू धका धयाच्वपिन्त स्थानीय सरकार दु धइगु सन्देश बिइत जिपिन्स मानवीय सेवाया ज्याय् लगे जुयाच्वनागु धका मेयर शाक्यं, ‘खुलामञ्चय् भोजन सेवा याना वयाच्वंगु संघ–संस्थाप्रति जिमिगु छु न वैरभाव मदु। जिमिसं नये मखंपि नयेगुपाखे बञ्चित याना लिनाछ्वये त्यनागु मखु धका धयादिसे थुकियात व्यवस्थित जक याये त्यनागु खः। जिमिसं व्यवस्थापन याये।’
शाक्यं सम्वन्धित संस्थाया प्रतिनिधिपि नाप जा नयाच्वपिन्त व्यवस्थापनया लागि चरण–चरणया छलफल यानागु धका स्मरण यानादिगु दु। ‘येँ महानगरपालिकां लकडाउनया इलय् जक १ लाख ५० हजार ससवया अप्वो परिवारयात राहत वितरण व २ लाख ५० हजार स्वया अप्वोसित जा नकेयेगु ज्या यानागु धका धाःगु खः,’ मेयर शाक्यं, ‘ताः ई तक लकडाउन जुगु लिपा न कोरोनाया महामारीपाखे मुक्त जुइ मफुगु अवस्थायात ध्यानय् तया येँ महानगरपालिकाया दुने च्वनाच्वपि ज्या याये फुपि व कोभिडया कारण बेरोजगार जूपिन्त उमिगु सामथ्र्य व सिपया आधारय् रोजगारी बिया येँ महानगरपालिकां जीवन निर्वाहया लागि पारिश्रमिक बिइगु ज्याया थालनी यानागु धका जानकारी न बियादिगु खः।
Categorized in राष्ट्रिय