प्रहरीया गोलिं सप्तरीइ प्यम्ह सित
लहनान्यूज | चिल्लाथ्व नवमि ११३७ (मार्च ६ २०१७)
सप्तरीइ प्रहरी व मधेसी मोर्चाया कार्यकर्ता दथुइ जूगु झडपय् लानाः प्यम्ह सीगु दु ।
प्रमुख विपक्षी नेकपा एमालेया मेची महाकाली अभियान अन्तर्गत राजविराजया औद्योगिक क्षेत्रय् जूगु सभाय् विरोध प्रदर्शन याःपिन्त प्रहरीं पनेत स्वःबलय् झडप जूगु खः । व हे झ्वलय् प्रहरीं गोलिं कयेकूबलय् प्यम्ह सीगु खः ।
सुरक्षाकःमिं कयेकूगु गोलिं लानाः मलेठ–४याम्ह २०दँया संजन मेहता सीगु दु । लिसें मलेठ–४ याम्ह हे पिताम्बर मण्डल, लिमनयाम्ह दिगम्बर झा व प्रसवनीयाम्ह आनन्द प्रसाद शाह सीगु खः ।
मेहतायात एमालेया ज्याझ्वः जूगु थासं १०० मिटरति तापाक गोलिं लानाः घटनास्थलय् हे सीगु खः । मण्डलयात वासः यायेत धरान थ्यनाकथं धैथें मदुगु खः ।
गोलिं लानाः गम्भीर घाइते जूम्ह झायात धरानस्थित वीपी कोइराला स्वास्थ्य विज्ञान प्रतिष्ठान यंकाच्वंबलय् लँय् हे मदुगु खः । साह धाःसा वासः यायेगु झ्वलय् मदुगु खः ।
गोली प्रहारं मेपिं च्याम्हलिसें १२दँयाम्ह मचा सुरेन्द्र साह तकं घाःपाः जूगु दु । प्रहरीया लाठी चार्जं नं छगू दर्जन स्वयां आपाः घाःपाः जूगु दु ।
सद्भावनाया केन्द्रिय दुजः भीमराज यादव, दीपेन्द्र चौधरी, क्षेत्रिय नायः लक्ष्मण यादव, संजय यादव नं लाठी चार्जं घाःपाः जूगु दु । घाःपाः जूपिं आपाःसित धरान व राजविराजय् वासः यानाच्वंगु दु ।
झडपय् लानाः छुं प्रहरीत नं घाःपाः जूगु दु ।
थ्व हे दथुइ, एमालें स्वन्हुया लागिं मेची महाकाली अभियान स्थगित याःगु दु । अथे हे मधेसी मोर्चां आन्दोलन घोषणा यासें सरकारयात बियागु समर्थन लित कायेगु नं क्वःछ्यूगु दु ।
Categorized in राष्ट्रिय
