थौं चीर स्वात
लहनान्यूज | चिल्लाथ्व सप्तमी ११३७ (मार्च ५ २०१७)
![](https://www.lahananews.com/sites/default/files/holi.jpg)
येँया बसन्तपुलिइ थौं चीर स्वाःगु लिसें थुगुसीया फागु पर्व औपचारीक रुपं न्ह्याःगु दु ।
थौं सुथसिया ७ः४७ताः ईया साइतय् बसन्तपुलिइ थीथी उंया कापः चिनातःगु चीर थंगु खः । फागुन शुक्ल अष्टमीया दिनय् पंया स्वतजाःया चीर स्वाइगु लिसें फागु पर्व न्ह्याइगु मान्यता दु ।
थुगुसी तिथि कथं अष्टमि मदुगु जूगुलिं थौं सप्तमिकुन्हु चीर स्वाःगु खः । थौं सप्तमिकुन्हु हे अष्टमि क्यनेधुंकूगु ल्याखं थौं हे चीर स्वाःगु खः ।
स्वनिगः लिसें पहाडी जिल्लाय् वइगु चिल्लाथ्व पुन्हि कुन्हु फागु अर्थात होलि न्यायेकीसा तराईया जिल्लाय् चिल्लागा पारुकुन्हु न्यायेकेगु याइ । थुगुसी वइगु मार्च १२ आइतबाःकुन्हु होलि पुन्हि लाःगु दु ।
थौं थंगु चीर छवाः लिपा क्वथलाः तिंख्यलय् वायेयंकेगु याइ ।
धार्मिक मान्यता कथं थः काय् प्रल्हाद नारायणद्यःया भक्त जूगुलिं हिरण्यकश्यपुं मिं मथीगु वरदान दुम्ह थः केहेँ होलिकाया मुलय् प्रल्हादयात तयाः च्याकाब्यूगु खः । तर, उगु मिइ प्रल्हादयात छुं मजुसें होलिका हे नौ जुल ।
थुकथं होलिका च्याःगु दिनय् विजयोत्सवया रुपं अबिर नापं थीथी उनलिसे होलि म्हितेगु न्ह्याःगु खः ।
Categorized in राष्ट्रिय