मेयर शाक्यं चाहबिलय् ताँ उलेज्या
नृपेन्द्रलाल श्रेष्ठ | अनलागा ६ ११४०,असोज २२ बिहीवाः
येँ महानगरपालिका वडा–७ चाबहिल चोकय् दयेकूगु आकाशे ताँया छगु ज्याझ्वः दथुइ मेयर विद्यासुन्दर शाक्यं उलेज्या यानादिगु दु। न्यासि वनेत सुरक्षाया लागि आकाशे ताँ दयेकःगु खः धका मेयर शाक्यं धयादिगु खः।
नँयाःगु ताँ दयेकूगु चाबहिलया ताँ कान्छामान निर्माण सेवां ८२ लाख ६६ हजार ७८३ रुपैयाँ निर्माण याःगु खः। आकाशे ताँया डिजाइनर इञ्जिनियर प्रेमबहादुर श्रेष्ठया कथं ताँया लम्बाइ २३ मिटर व चौडाइ २ मिटर दु धका धयादिगु खः।
वडा नम्बर ७ या अध्यक्ष शुद्धकुमार डंगोलं थुगु समानान्तर जुइ कथं मेगु ताँ मेथाय् न दयेकेमाः धका धयादिगु खः।
महानगरं चाबहिल नाप वडा नम्बर ८ य् जयबागेश्वरी न आकाशे ताँ दयेका च्वंगु दु। मित्रपार्कपाखे पशुपति वनेगु थासय् स्थानीयपिन्स न थज्यागु ताँ दयकेगु लागि माग याना वयाच्वंगु धका
महानगरया मेयर शाक्यं धयादिगु खः। महानगरं माइतीघर मण्डलाय् न अज्यागु ताँ दयेका च्वंगु खः।
Categorized in राष्ट्रिय
