लगमय् शिलखाना मखसें ऐतिहासिक वौद्ध विहार दयेकेत स्थानीयया माग
नृपेन्द्रलाल श्रेष्ठ | अनलाथ्व चतुर्दशी ११४० (असोज १४) बुधवाः
![](https://www.lahananews.com/sites/default/files/lagan1-ln.jpg)
येँ महानगरपालिका २१ वडा लगं त्वालय् ऐतिहासिक वौद्ध विहार थुनां थापा परिवारं दरवार व तबेला दयेकूगु थासय् हाकनं नं थापातय्गु दरवार दयेकेमाःगु मागया स्थानीयं विरोध याःगु दु ।
थौंकन्हय् शिलखाना धकाः म्हस्यूगु थासय् ४सः दँ न्ह्यः प्रताप मल्लया पालय् हे वौद्ध विहार दुगु व अन आः ऐतिहासिक वौद्ध विहार हे दयेकेमाःगु माग स्थानीय वासिन्दां याःगु दु । थापा परिवारलिसें छुं मनूतयसं शिलखाना न्हंकेमज्यूगु सः तयेधुंकाः स्थानीय वासिन्दां पुलांगु ईतिहासयात कायम तयाः वौद्ध विहार हे दयेकेत माग याःगु खः ।
उगु थासय् येँ महानगरपालिकां वौद्ध विहार व शिलखाना नितांया ईतिहास खनेदइगु कथं संग्रहालय व लगं पार्क दयेकेगु योजना न्ह्यःने हःगु खः ।
अधिवक्ता प्रकाशमणि शर्मा, सञ्जय अधिकारी व राष्ट्रिय विभूति भीमसेन थापा स्मृति प्रतिष्ठानया कोषाध्यक्ष सुशीलविक्रम थापां शिलखाना हे दयेकेत माग यासें सर्वोच्चय् रिट दर्ता यायेधुंकाः थनया निर्माण ज्या द्यूगु दु ।
न्यायधीश हरिकृष्ण कार्की व पुरुषोतम भण्डारीया असोज ८ या मंकाः इजलासं असोज १८ या पेसी क्वःछ्यूगु दु । सर्वोच्चं शिलखानाया जगयात लिच्वः मलाइगु कथं संरचना दयेकागु प्रमाणलिसें निगुलिं पक्षयात उपस्थित जुइत धाःगु दु ।
प्रताप मल्लया पालय् हे अस्तित्वय् दुगु किर्तिपुण्य महाविहार लगं बहाःया कचा बहाःया रुपं दुगु खः । तर, आः भीमसेन थापाया किजाया इतिहासलिसे स्वानाः ईतिहासयात हे किचलय् लाकेगु ज्या जुयाच्वंगु स्थानीयया कुंखिना दु ।
![](https://www.lahananews.com/sites/default/files/pictures/lagan2-ln.jpg)
भीमसेन थापाया किजा रणवीरसिंह थापा (स्वामी अभयानन्द) या छेँया जक इतिहास उल्लेख यानाः मल्लकालिन इतिहासयात तोडमोड यायेगु ज्या जुयाच्वंगु स्थानीयया द्वपं दु ।
आः नं उगु थासय् ऐतिहासिक विहारया बौद्ध चैत्यया लिसें विहारलिसे सम्बन्धित मुर्ति व शिलापत्रलिसेंया भग्नावशेष दनि ।
थन येँ महानगरपालिकां पार्क दयेकीगु जानकारी वयेधुंकाः स्थानीय वासिन्दां २०७६ जेठय् हे येँ महानगरपालिका सहरी योजना आयोगय् उगु थासय् बौद्ध विहार हे दयेकेत माग यासें निवेदन ब्यूगु खः ।
येँ माहानगरपालिकां ऐतिहासिक व पुरात्वात्तिक महत्वयात ल्यंकाः पार्क दयेकेत पटक–पटक सहलह यायेधुंकाः थःपिं सकारात्मक जुयागु स्थानीयया धापू दु ।
‘घना बस्ती दथुइ चकंगु थाय् म्ह्वः जक दुगु अवस्थाय् सर्वसाधारणयात स्वच्छ फय्या नितिं पार्क दयेकेगु खँय् जिमिगु समर्थन दु,’ स्थानीय रिपक शाक्यया धापू दु । ‘तर, इतिहास हे न्हंकाः संरचना दयेकेज्या जुल धाःसा कानुनी लडाईँया लँपु ज्वनेत जिपिं बाध्य जुइ ।’
ताः ई प्रधानमन्त्री जूम्ह भिमसेन थापां उगु विहारय च्वनीपिं लगं बहाःया शाक्य परिवारया अनं भचा क्वय् ध्वाखासी नाय्पाच्वय् छ्वयाबियाः उगु थाय् अतिक्रमण यानाः छेँ व सलया तबेला दयेकूगु इतिहास दुगु नं शाक्यं धयादिल ।
आः भवनय् दुगु विश्वरुपया अंगःकिपाय् न्ह्यथनातःगु मिति कथं थुगु संरचना वि.सं. १८७६य् दयेकूगु खनेदु । लिपांगु इलय् शिलखानाया रुपं छ्यलावःगु उगु भवन २०७२ सालया भुखाचं क्षतिग्रस्त जूगु खः ।
प्रस्तावित लगं पार्क क्षेत्रय् प्रताप मल्लया पालय् हे बौद्ध विहार अस्तित्वय् दुगु व उगु क्षेत्रय् प्रताप मल्लया कायपिं नृपेन्द्र मल्ल व चक्रपतेन्द्र मल्लया पालय्या शिलालेख अले चैत्यत आःतक्कं दनिगु स्थानीयं धाःगु दु ।
२०७७ साल माघ मसान्ततक्कय् ज्या क्वचायेकेगु कथं कंडेल/के.एण्ड केजी/रमिता जे.भीं पार्क दयेकेगु जिम्मा काःगु दु । थुगु पार्कया करीब ४ करोड लागत अनुमान याःगु दु ।
Categorized in राष्ट्रिय