नेपालय् मस्त २०६१म्हेसित कोरोना संक्रमण
लहनान्युज | दिल्लाथ्व दशमी ११४०, असार १६ मंगलवाः
![](https://www.lahananews.com/sites/default/files/hh1_3.jpg)
सरकारं नेपालय् मस्तयेत कोरोना संक्रमण अप्वया वःगुलि अभिभावकपिन्त सचेत जुइत आग्रह यानादिगु दु ।
नेपालय् १८ दँ स्वया क्वयेयापि २०६१म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं जानकारी बिःगु दु ।
सदूरपश्चिमय् ९ दँ स्वया क्वययापि १७५म्हेसित कोरोना संक्रमण खनेदुगु खः । डा. गौतमया कथं सुदूरपश्चिमय् कोरोना संक्रमण खनेदुपि मस्त मां अबु नाप भारत लिहा वःपि खः ।
मस्तयेत कोरोना संक्रमण खनेदुलि मेपिन्त न सरे जुइगु सम्भावना अप्व जुगुलि मन्त्रालयं मस्तयेत छेँ हे तया तयेथ इनाप याःगु दु ।
मस्तयेत हुलमुलय् मयेकेत, अनिवार्य मास्क तयेकेत, मेपिनाप २ मिटरया दूरी कायम यायेगु, सावः लखं ल्हाःसिइकेत स्वास्थ्य मन्त्रालयं इनाप याःगु खः ।
अथेहे मां अबुयात संक्रमण जुसा मस्त नाप अलग्ग च्वने इनाप याःगु दु ।