पत्रकार दबूया त्यःछिंत्यः ज्याझ्वः क्वचाल
लहनान्यूज | थिंलागा पारु ११३७ (डिसेम्बर १४ २०१६)
![](https://www.lahananews.com/sites/default/files/tyosin.jpg)
नेवाः पत्रकार राष्ट्रिय दबू, येँ जिल्लाया ग्वसालय् जूगु निन्हुयंकंया त्यःछिंत्यः ज्याझ्वः थौं क्वचाल ।
म्हिगः येँया दुनेया बस्तीइ थःने व क्वःने लागा चाःह्यूगु पत्रकार दबूया येँया पुचलं थौं धाःसा पिनेया नेवाः बस्तीइ वनाः त्यःछिंत्यः फ्वंगु खः । थौं येँया कुलेश्वर, खुसिबुँ, बहति लिसें गल्कोपाखाय् वनाः त्यःछिंत्यः फ्वंगु खः ।
थौं पुचलं कुलेश्वरय् नेवाः तीर्थराम डंगोल, बहतिइ डा. महेशमान श्रेष्ठ, गल्कोपाखाय् त्रिरत्न मानन्धरलिसेंयाथाय् त्यःछिंत्यः फ्वंवंगु खः । अथे हे खुसिबुँया मंकाः समाजपाखें त्यःछिंत्यः ब्यूगु खः ।
थौं विशेष रुपं थःपिन्थाय् नं त्यःछिंत्यः काः वयेत इनाप वःगु कथं त्यःछिंत्यः कायेत पिनेया बस्तीइ नं वनागु पत्रकार दबू, येँ जिल्लाया नायः नातीकाजी महर्जनं जानकारी बियादिल ।
थौं पत्रकार दबू, येँया त्यःछिंत्यः ज्याझ्वलय् संस्थाया पदाधिकारी, दुजःतलिसें पत्रकार दबू केन्द्रया प्रतिनिधि, बिज्यापूननि दाफा खलः पुचः व म्येहालामि किरण सायमिया नं ब्वति दुगु खः । दाफा खलः व सायमिया न्ह्यब्वायलिसें त्यःछिंत्यः ज्याझ्वः झः झः धाःगु खः ।
Categorized in राष्ट्रिय