१३क्वःगु ज्यापु दिवस तःजिक हन
लहनान्यूज | थिंलाथ्व पुन्हि ११३७ (डिसेम्बर १३ २०१६)
![](https://www.lahananews.com/sites/default/files/jyapu1.jpg)
ज्यापु संस्कृति विकास कोषया ग्वसालय् १३क्वःगु ज्यापु दिवस तःजिक हंगु दु ।
थौं १३क्वःगु ज्यापु दिवसया झ्वलय् येँया बसन्तपुरय् तःजिगु ज्याझ्वः यासें थीथी ख्यलय् विशिष्ट योगदान ब्यूपिं ज्यापु समुदाय लिसें थीथी समुदायया विशिष्ट व्यक्तित्वपिन्त हनेगु ज्या नं जूगु खः । सम्मानित व्यक्तित्वपिन्त ज्याझ्वःया मू पाहां प्रधानमन्त्री पुष्पकमल दाहालं सम्मान लःल्हानादिल ।
थुगुसीया ज्यापु प्रज्ञा सिरपालं नेवाः लिसें आदिवासी जनजाति आन्दोलनया हे न्ह्यलुवा पद्मरत्न तुलाधरयात हंगु दु । ज्यापु रत्न सिरपाः धाःसा पूर्वान्चल क्षेत्रीय प्रशासन ज्याकूया क्षेत्रीय प्रशासक राजेश्वरमान सिंहयात लःल्हात ।
व हे कथं पत्रकारीतापाखे उपेश महर्जनयात हन सा कासापाखे विश्व मिसा बडिबिल्डिङ कासाय् कँयया तक्मा त्याकेत ताःलाःम्ह ननिता महर्जन बज्राचार्ययात व जुडो कासामि इन्द्र डंगोलयात लःल्हात । उकिया नापं म्येहालामि दिपा महर्जनयात नं नेपालभाषा विषयस स्नातकोत्तर तगिमय् ने.सं ११३५य् न्हाप लाःगुलिं हंगु खः ।
![](http://www.lahananews.com/sites/default/files/pictures/jyapu3.jpg)
ज्यापु विशेष सम्मानपाखे साहित्यकार शरद कसाः, वरिष्ठ पत्रकार पुष्कर माथेमालिसें खुम्हेसित हंगु खः ।
![](http://www.lahananews.com/sites/default/files/pictures/jyapu4.jpg)
कलापाखे मैंचा बाउचाया कलात्मक चित्रणया नितिं मैचा बाउचाया सर्जक बुकेस महर्जनयात हन ।
![](http://www.lahananews.com/sites/default/files/pictures/jyapu2.jpg)
बसन्तपुरया औपचारीक ज्याझ्वः स्वयां न्ह्यः र्यालीं देय् चाःह्यूगु खः । येँया कमलादी गनेद्यःया थासं न्ह्याइगु र्याली रत्नपार्क, बीर अस्पताल, न्हूसतक, खिचापुखू, ओमबहाः, यंगाः, लगं, ब्रम्हत्वाः, ओन्दे, जैसिदेगः, क्वहिति, भिंद्यःत्वाः, मरु, यट्खा, त्यंगः, क्वाःबहाः, थँबहि, ज्याथा, इनबहालय् कमलादि गनेद्यः जमःत्वाःया द्यःछेँय् लाकाः त्यर, असं, थायमदु, वंगः, मखनं बसन्तपुर थ्यंकूगु खः ।
Categorized in राष्ट्रिय