सांस्कृतिक ज्याझ्वःलिसें बेहोसियात हनीगु
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
![](https://www.lahananews.com/sites/default/files/3_7.jpg)
वइगु थिंलागा चतुर्थी (पुष २ गते) शन्चरबाःया दिनय् कलाकार परिषदं वरिष्ठ संगीतकःमि रत्न बेहोसियात यलय् तःजिक हनीगु जूगु दु ।
ज्याझ्वःया जानकारी बीत थौं नेवाः पत्रकार राष्ट्रिय दबू यल जिल्लाया समन्वस जूगु पत्रकार सम्मेलनय् थिंलागा चतुर्थीया दिनय् वरिष्ठ कलाकार रत्न बेहोसि बज्राचार्य हना सनिल ज्याझ्वःया ग्वसाः ग्वयाः बेहोसियात हनेगु जानकारी ब्यूगु खः । बेहोसियात ख्यालि जुजु मदनकृष्ण श्रेष्ठपाखें तपुलिं पुइकाः, दोसल्लां न्ययेकाः तका व हनापौलिसें हनेगु जानकारी नं पत्रकार सम्मेलनय् ब्यूगु खः ।
निब्वय् न्ह्यब्वइगु ज्याझ्वः दुने हना ज्याझ्वः ब्वय् कलाकार बेहोसिया परीचयात्मक भिडियो प्रोफाइल नं क्यनीगु धाःगु दु ।
![](http://www.lahananews.com/sites/default/files/pictures/4.jpg)
ज्याझ्वःया निगूगु ब्वय् धाःसा म्येहालामि अमरराज शर्मा, स्वयम्भुराज शाक्य, निशा देसार, सानुबाबु महर्जनलिसें नं थःगु सांगितिक न्ह्यब्वया न्ह्यब्वइगु धाःगु दु । लिसें कृष्णभक्त महर्जन, आराध्यलक्ष्मी खड्गी, इश्वर जोशी, मिलेश तण्डुकार, मिलन तण्डुकार, मोहन व्यन्जनकार, संजय शर्मा राजोपाध्याय लिसेंया कलाकारपिनिपाखें ख्यालः, हुलाप्याखं, वाद्यवादन न्ह्यब्वइगु जूगु दु ।
थौंया पत्रकार सम्मेलनय् नेवाः पत्रकार राष्ट्रिय दबूया केन्द्रिय न्वकूलिसें कलाकार परिषद तदर्थ समितिया दुजः सुरजबीर बज्राचार्यं सम्मानित जुइम्ह कलाकार रत्न बेहोसि बज्राचार्यया बारे व ज्याझ्वःया बारे कनादीगु खः ।
ज्याझ्वलय् पत्रकार दबूया न्वकू बज्राचार्य, कलाकार रत्न बेहोसि, नेवाः पत्रकार राष्ट्रिय दबू यल जिल्लाया नायः सुरज व्यन्जनकार व पत्रकार दबू यल जिल्लाया छ्यान्जे राजेश बज्राचार्यं पत्रकारपिन्सं न्यंगु न्ह्यसःया लिसः बियादिल ।
Categorized in मनोरन्जन