यलय् बुद्ध जयन्ती बुद्ध पूजा व वन्दनाय् सिमित
लहनान्युज | बछलाथ्व अष्टमी ने.सं. ११४०, बैसाख १९ शुक्रवाः
![](https://www.lahananews.com/sites/default/files/Rudra-Varna-Mahavihar.jpg)
कोरोना भाइरसया जोखिमया हुनिं यलय् थुगुसी २५६४ क्वःगु बुद्ध जयन्ती समारोह औपचारिकता जक जुइगु जूगु दु । ।
६८ दँनिसें मदिक्क न्ह्यानाः वयाच्वंगु भगवान बुद्ध नगर परिक्रमा, ज्ञानमाला भजन थेंजाःगु ज्याझ्वः स्थगित यानागु २५६४ औं बुद्ध जयन्ती मूल समारोह समितिं प्रेस विज्ञप्ति पिथनाः सार्वजनिक याःगु दु । समितिं थुगु दँय् सामाजिक दुरी कायम यासें समितिया सल्लाहकारपिं, कार्यकारिणी पदाधिकारीपिं, कार्यकारिणी सदस्यपिं, संचालन समितिया दुजःपिं, महाविहार संरक्षण समितिया दुजःपिं, ललितपुर बुद्ध जयन्ती कोषया पदाधिकारीपिं जक च्वनाः हनेगु क्वःछ्यूगु दुसा थुगुसी बुद्ध पूजा व बुद्ध वन्दना जक यानाः बुद्ध जयन्ती हनीगु जूगु खः ।
समितिं सकलसित छेँय् हे च्वनाः दीप प्रज्वलन व बुद्ध वन्दना यानाः बुद्ध जयन्ती हनेत नं इनाप याःगु दु ।
कोरोना भाइरसया संक्रमणं मदुपिं सुखावती भूवनय् बासं लायेमा धकाः कामना यासें संक्रमणं कःपिं सकलसिया उसाँय् याकनं बांलायेमा धकाः नं कामना याःगु दु । थुगुसी बुद्ध जयन्ती न्यायेकेगु पाः लिच्छिवी राजा शिवदेव संस्कारित ओंकुलि श्री रुद्धवर्ण महाविहार ओकुबहाःयागु खः ।