निगू राप्रपाया एकिकरण थौं
लहनान्यूज सम्वाददाता | कछलागा सप्तमी ११३७ (नोभम्बर २१ २०१६)
![](https://www.lahananews.com/sites/default/files/raprapa.jpg)
राष्ट्रिय प्रजातन्त्र पार्टी व राष्ट्रिय प्रजातन्त्र पार्टी नेपालं थौं येँया प्रज्ञा प्रतिष्ठानय् छगू ज्याझ्वः यासें पार्टी एकताया घोषणा यायेत्यंगु दु ।
पार्टि एकिकरण धुंकाः पार्टीया नां राष्ट्रिय प्रजातन्त्र पार्टी जुइगु व पार्टिइ निम्ह नायः दइगु जूगु दु । पशुपति शमसेर राणा पार्टीया राष्ट्रिय नायः जुइसा कमल थापा पार्टी नायः जुइ ।
निम्ह नायः लिसें ५ शीर्ष नेताया नेतृत्व दइगु धाःगु दु, गुकी लोकेन्द्रबहादुर चन्द, विश्वबन्धु थापा व प्रकाशचन्द्र लोहनी दइ । निगुलिं पार्टीया १५०/१५० केन्द्रिय दुजः दुथ्याकाः ३सः दुजःया केन्द्रीय समिति दयेकी ।
निगुलिं पार्टीया आःया पदाधिकारी यथावत भाला कःघानाः च्वनीगु सहमित जूगु दु ।
पार्टीया ध्वाँय् राप्रपा नेपालया जुइगु व चुनाव चिं धाःसा महाधिवेशनं क्वःछीगु धाःगु दु । स्वला दुने महाधिवेशन यायेगु सहमति जूगु दु ।
एकीकरण धुंकाः राप्रपा संसदय् ३७ सिट लिसें प्यंगूगु तःधंगु दल जुइ ।
Categorized in राजनीति