मिसा बुद्धिचाल कासा फागुन २३ निसे २५ गते जुइगु
लहनान्युज | चिल्लाथ्व पंचमी ११४०
![](https://www.lahananews.com/sites/default/files/b_3.jpg)
काठमाडौं जिल्ला बुद्धिचाल संघया ग्वसालय् हेरा माया श्रेष्ठ स्मृति राष्ट्रव्यापी मिसा बुद्धिचाल कासा थ्व हे वइगु फागुन २३ निसे २५ गते जुइत्यःगु दु ।
काठमाडौं जिल्ला बुद्धिचाल संघं छगु पत्रकार सम्मेलन याना उगु ज्याझ्वःया जानकारी बिगु खः । काठमाडौं जिल्ला बुद्धिचाल संघया निवर्तमान अध्यक्ष अमृतचन्द्र श्रेष्ठया मदुम्ह मां हेरा
माया श्रेष्ठ लुमन्तिइ नाप नारी दिवस कुन्हु राष्ट्रव्यापी मिसा बुद्धिचाल कासा यायेगु घोषण यागु खः ।
मदुम्ह हेरा माया श्रेष्ठया काय् संघया निवर्तमान अध्यक्ष अमृत चन्द्र श्रेष्ठं थुगु कासाया लागि दँय् न्यय् द्धः ग्वाहालि यायेगु घोषण यानादिगु खः ।
काठमाडौं जिल्ला बुद्धिचाल संघया अध्यक्ष नारायण श्रेष्ठया सभाध्यक्षताय् जुगु उगु ज्याझ्वलय् नेपाल बुद्धिचाल संघया केन्द्रीय उपाध्यक्ष नारायण दास गमाल, महिला बुद्धिचालया पुर्व च्याम्पियन मोनालिशा खम्बु, अन्तर्राष्ट्रिय आर्बिटर उमेश केसी, नेपाल बुद्धिचाल संघया केन्द्रिय सदस्य बिनोद विश्वकर्मा व नेपाल बुद्धिचालया पुरुष च्याम्पियन पुरुषोत्तम चौलागाईंस पिनिगु ब्बतिगु दुगु खः ।
काठमाडौं जिल्ला बुद्धिचाल संघया अध्यक्ष सचिव एवं कार्यक्रम संयोजक प्रविण बहादुर भडेलं थुगु कासाय् न्ह्यगु प्रदेशपाखे हे ब्बति दइ धयादिगु खः ।
कासाय् न्हाप लाम्हेसित नगद न्यय् द्धः, ल्युयात झीन्या द्धः, ल्युयाल्यु च्या द्धः, खु द्ध व प्य द्धः सिरपा तया तःगु दु ।