हलिं नेवाः म्ये कासा लिज्यात
लहनान्यूज सम्वाददाता | कछलागा दुतिया ११३७ (नोभम्बर १६ २०१६)
![](https://www.lahananews.com/sites/default/files/wno-2.jpg)
हलिं नेवाः दबू नेपाः देय् मू कवःया ग्वसालय् थ्व हे वइगु पोहेंलाथ्व चतुर्थी ११३७ (पौष १८ २०७३)य् जुइगु धयातःगु ‘हलिं नेवाः म्ये कासा’ लिज्याइगु जूगु द ।
दबू नेपाः कवलं थौं येँइ् पत्रकार सम्मलेनया ग्वसाः ग्वयाः आः थुगु कासा वइगु सिल्लागा १४ ११३७ (फेब्रुअरी २५ २०१७)य् जुइगु जानकारी ब्यूगु खः ।
पत्रकार सम्मलेनय् नेपाः कवःया नायः पुष्कर माथेमां नेपाः पिनं कासाय् ब्वति काये मंदुपिनिगुपाखें धें धें बल्लाःया लागिं माःगु तयारी लिसें लिपांगु धेंधें बल्लाःया लागिं नेपाः थ्यंकः वयेत नं थःपिन्त यक्व हे इनाप वःगुलिं कासायात लिछ्यायेमाःगु धयादिल । लिसें नायः माथेमां नेपाः दुनं नं स्वन्ति व न्हूदँया लकस दथुइ तयारीया लागिं ई मगाःगु धकाः कासा लिछ्यायेत इनाप वःगु जानकारी नं बियादिल ।
कवःया मू छ्यान्जे रश्मिला प्रजापतिं लिपांगु धेंधें बल्लाःया लागिं नेपाः दुनेया कासामित ल्ययेत पोहेंलागा पारु ११३७ (जनवरी १३ २०१७) कुन्हु ल्यज्या जुइगु धयादिल । अथे हे नेपाः पिनेयापिनिगु लागिं स्काइप अडिसन पोहेंलागा ८ व ९ ११३७ (जनवरी २० व २१ २०१७)या दिनय् ल्यज्या (अडिसन) जुइगु कनादिल ।
पत्रकारतयगु न्ह्यसःया लिसः ब्युसें मू छ्यान्जे प्रजापतिं थुगु धेंधें बल्लाखय् हलिंन्यंकनं न्ह्याम्ह नं कलाकारं नेपालभाषाया म्ये हालाः ब्वति कायेफइगु धयादिल । धेंधें बल्लाखय् त्याकामिपिन्त मुक्कं १ लख तकाया सिरपाः इनीगु धाःगु दु ।
![](http://www.lahananews.com/sites/default/files/pictures/wno.jpg)