सम्पदामार्ग दयेकेगु ज्या लच्छिया दुने न्ह्याइगु
लहना न्यूज | ने.सं. ११४० थिंलाथ्व तृतिया (२९ नोभेम्बर २०१९), शुक्रवाः
![](https://www.lahananews.com/sites/default/files/swayambhu.jpg)
येँ महानगरपालिकां हनुमानध्वाखानिसें स्वयम्भूतक दयेकेत्यंगु सम्पदा पदमार्गया ज्या लच्छिया दुने शुरु याइगु जूगु दु ।
महानगरपालिकाया प्रवक्ता लिसें वडा ल्याः १५या वडाध्यक्ष ईश्वरमान डंगोलं सम्पदा पदमार्गया गुरुयोजना दयेकेधुंकूगुलिं लच्छिया दुने दयेकेगु ज्या न्ह्याइगु धयादिल । थुगु पदमार्गपाखें निगू सम्पदायात स्वाइगु धयादिसें प्रवक्ता डंगोलं पदमार्ग दुने लाःगु सतः, फल्चा, परम्परागत ढाँचाया छेँ, लँ भिंकेगु ज्या नं न्ह्याइगु धयादिल ।
हनुमानध्वाखानिसें स्वयम्भूतकया २.२ किलोमिटरया लँ महानगरपालिकां हे खर्च यायेत्यंगु खः ।
प्रवक्ता डंगोलं महानगरपालिकाया सम्पदा पदमार्ग दुने लाःगु लँ दकलय् न्हापां भिंकेगु धयादिल । आः मौलिक संस्कृति न्ह्यब्वइगु छेँ गजाःगु जुइमाःगु व पदमार्गय् लाःगु थासय् उकथंया हे छेँ दय्केगु नितिं डिजाइन जुयाच्वंगु नं धयादिल । वय्कलं सम्पदा मार्ग निगू सम्पदायात पैदलमार्गकथं विकास यायेत महानगरपालिकां २गू करोडतका बजेट फ्याःगु नं जानकारी बियादिल । उगु सम्पदामार्ग येँ महानगपालिकाया वडा ल्याः १५, १७ व १८ लाः ।
विश्व सम्पदाया धलखय् दुथ्यानाच्वंगु स्वयम्भूनिसें हनुमानध्वाखातकया पदमार्गय् छगू हे कथंया ल्वहतं सीगु नं धयादिल ।
पदमार्गय् लाःगु थासय् नेवाः परम्परायात विशेष बः बीगु जूगु दु । विशेष यानाः नेवाः परम्परायात पर्यटकलिसे तप्यंक स्वायेगु नितिं ग्वाहालि जूवनीगु महानगरपालिकां न्ह्यथंगु दु ।
येँ महानगरपालिका वडा ल्याः १८या वडाध्यक्ष न्हुछेकाजी महर्जनं हनुमानध्वाखानिसें स्वयम्भूतकया पदमार्गय् छगू हे कथंया ल्वहतं सीगु कारण न्ह्यथनादिसें पर्यटकपिन्त अलमल मजूसे उगु लँपुपाखें निगू सम्पदाय् वनेत अःपुइगु धयादिल ।
पर्यटकपिन्सं सम्पदा अवलोकन यायेगु नितिं न्यासि वनेगु हे ययेकीगु जूगुलिं महानगरं सम्पदा मार्ग दयेकेत्यंगु वडाध्यक्ष महर्जनं धयादिल ।
Categorized in राष्ट्रिय