मरुसतः पुनःनिर्माणया ज्या बच्छि क्वचाल
नृपेन्द्रलाल श्रेष्ठ | कौलागा दशमी ११३९ (अक्टुवर २३ २०१९)
![](https://www.lahananews.com/sites/default/files/Kashthamandap-News-2.jpg)
मरुसतः पुनःनिर्माणया ज्या थ्यंमथ्यं बच्छि क्वचाल । काष्ठमण्डप पुनःनिर्माण समितिं सोमवाः सार्वजनिक सुनुवाइ यासें पुनःनिर्माणया ज्या बच्छि क्वचाःगु जानकारी ब्यूगु खः । थ्व हे झ्वलय् उपभोक्ता समितिया नायः राजेन्द्र शाक्यं पुनःनिर्माणया नितिं धेबाया अभाव मजूगु नं धयादिल ।
वय्कलं येँ महानगरपालिकां बीगु धयातःगु न्यागूत्याः करोडतका मध्ये स्वंगू करोड जक खर्च जूगु नं जानकारी बियादिल ।
निदँया दुने ज्या क्वचाय्केगुकथं ज्या जुयाच्वंगुली सिँया अभावं समस्या जूगु नं उपभोक्ता समितिं जानकारी ब्यूगु दु । आःतक ४द्वः क्यूफिट सिँ छ्यलेधुंकूगु दुसा अझ नं १२द्व क्यूफिट सिँ माःगु नं धाःगु दु ।
न्हय्गूगु शताब्दीइ दय्कूगु धयातःगु उगु मरुसतः वि.सं. २०७२ सालया विनाशकारी भुखाचं पूवंक हे क्षति जूगुलिं थुगुसिनिसें उपभोक्ता समितिपाखें पुनःनिर्माणया ज्या जुयाच्वंगु खः ।
काष्ठमण्डप पुनर्निर्माण समितिया अध्यक्ष ३ नंबर प्रदेशया सांसद राजेश शाक्यं दयेकुगु स्वया आतकया प्रगति विवरण व आर्थिक प्रतिवेदन सार्वजनिक यानादिगु खः । येँ महानगरपालिकां ५ करोड अनुदानया ग्वाहालि काष्ठमण्डपया पुनर्निर्माण ज्या न्ह्याःगु खः । काष्ठमण्डप पुनर्निर्माणया अध्यक्ष सांसद शाक्यं आतक ३ करोड खर्च जुइ धुकगु दु धका जानकारी बियादिगु खः ।
उगुु सार्वजनिक सुनुवाइ ज्याझवलय् सम्पदा विज्ञ डा.सुर्दशन तिवारी, संघीय सांसद कृष्णगोपाल श्रेष्ठ, बिणा श्रेष्ठ, वडा अध्यक्षपिं चीनीकाजी महर्जन, मचाराजा महर्जन, बालकृष्ण श्रेष्ठ नाप सम्पदा विज्ञ कुलभक्त शाक्यपिन्स ब्बति कयादिगु खःसा ज्याझ्वः गौतम डंगोलं न्ह्याकादिगु खः ।