हलिं नेवाःगुथिया साहित्य गोष्ठी
लहनान्युज | कौलाथ्व द्धितिया ११३९ (सेप्तेवर ३० २०१९)
![](https://www.lahananews.com/sites/default/files/hali.jpg)
‘झीगु गुथिझीगु सम्पदा’ नारा बियाःहलिं नेवाःगुथि, गःछेँ कचा, किपूया ग्वसालय् किपुलिइ न्हय्क्वःगु नेपालभाषा साहित्य गोष्ठी जुल ।
बुद्धिलाल ज्यापुया सभाध्यक्षताय् कमला महर्जनं लसकुस यानादीगु उगु ज्याझ्वलय् लोककवि राजभाइ जकःमि मूपाहाँ कथं झायादीगु खःसा विशेष पाहाँ कथं किपू नगरपालिकाया कार्यवाहक प्रमुख हर्ष महर्जन झायादीगु खः । ज्याझ्वःया समीक्षा प्रा.डा. चन्द्रमान बज्राचार्यं यानादीगु खः ।
ज्याझ्वलय् लुमन्ति चित्रकार, बसन्त नकःमि, तेजकृष्ण श्रेष्ठ, मोक्षबहादुर अमात्य, कविन्द्रलाल प्रधान, पि.के. श्रेष्ठ, रुपा शाही, विनिता खड्गी, शम्भुराम ‘मान्छे’, सुवर्ण महर्जनलिसें ३०म्ह च्वमिपिन्सं थःथःगु च्वसु ब्वनाः न्यंकादीगु खः ।
ज्याझ्वःया दथुइ इसासपाखें वीरप्रसाद भन्सारी, गुज्ये मालाकार, रत्नशोभा महर्जनपिन्सं म्ये हालादीगु खः ।
ज्याझ्वलय् ब्वंगु चिनाखँ, बाखं, हाइकु दक्वं हे बांलाःगु खँकनादिसे समीक्षकप्रा.डा. बज्राचार्यं चिनाखँ च्वय्बलय् म्हो खँग्वलं यक्वभाव बिइकथं जुल धाःसा स्तरीय जुइगु धयादिल । अथेहे, मूपाहाँ जकःमिं चिनाखँ धइगु च्वमिं थःगु नितिं स्वयां नं ब्वँमिपिनिगु नितिं अप्वः जुइगुलिं चिनाखँ च्वय् बलय् यक्व ब्वँमिपिन्सं थुइगु भासं च्वय् माःगु खँय् बः बियादिल ।
विशेष पाहाँहर्ष महर्जन, हलिं नेवाःगुथिया नायः जुजुमान श्रेष्ठ व चिनाखँ ब्वँमिपाखें नरसागर श्रेष्ठपिन्सं नुगःखँ तयादीगु खः ।