त्वायना व मुलगुठीयात उपाधि
लहनान्युज | यंलागा नवमी ११३९ (सेप्तेवर २३ २०१९)
![](https://www.lahananews.com/sites/default/files/b_1.jpg)
थिमिइ ग्वसाः ग्वःगु ‘प्यक्वःगु मिस्टर भक्तपुर २०७६’ व ‘न्हापांगु मिसा एथलेटिक्स फिजिक्स’या उपाधि छसिकथं जयराम त्वायना व सनम मुलगुठीं त्याकूगु दु ।
७० प्लस किलो तौल पुचःपाखे त्वायनां ४३म्ह कासामियात ल्यूने लाकाः उगु उपाधि त्याकूगु खःसा मुलगुठीं च्याम्ह मिसा कासामिपिन्त ल्यूने लाकूगु खः ।
![](https://www.lahananews.com/sites/default/files/pictures/b1_2.jpg)
भक्तपुर जिल्ला शारीरिक सुगठन तथा फिटनेस संघं ग्वसाः ग्वःगु उगु त्यासा त्याकादीम्ह त्वायनायात मध्यपुर थिमि नगरपालिकाया प्रमुख मदनसुन्दर श्रेष्ठं दसिपौ, शिल्ड, मेडल व ब्यानेट लःल्हानादीगु खःसा मिसा एथलेटिक्स फिजिक्सया विजेता मुलगुठीयात नगरपालिकाया उप–प्रमुख अञ्जनादेवी मधिकःमिं उपाधि लःल्हानादिल । अथे हे,उपाधि विजेतापिन्त निक भुजीकिक व शिवशिखर कृषि सहकारीं नगद सिरपाः लःल्हाःगु खः ।
प्रताप काजी बरिया संयोजकय् ९म्ह दुजः दुगु निर्णायक पुचःपाखें अमीतकुमार मण्डल ल्यू, रामचन्द्र लियांल्यू, नितेश श्रेष्ठ प्यंगूगु व विवेक अवाल न्यागूगु थासय् लाःगु घोषणा याःगु खः । ५५गू किलोनिसें ७०गू किलो स्वयां अप्वः ग्यसुयात न्यागूगु पुचः दय्काः प्रत्येक पुचःपाखें छम्ह छम्हेसित उत्कृष्ट बडीबिल्डर ल्यःगु खः ।
अशोक घःजुं संयोजन याःगु उगु कासा सञ्चारकःमि केके मानन्धर व ज्ञानेन्द्र मानन्धरं मंकाःकथं न्ह्याकूगु खःसा जिल्लापाखें अन्तर्राष्ट्रिय कासा त्याकादीपिं कासापिन्त सम्मान यासें निर्णायकया नितिं कोर्ष पूवंकादीपिं नापं पदोत्रति जुयादीपिं कासामिपिन्त नं दसिपौ लःल्हाःगु खः ।
वि.सं. २०५२ सालय् स्वास्थ्यया नितिं खेलकूद, राष्ट्रया नितिं खेलकूद’ नारा बियाः पलिस्था याःगु उगु संघं स्वक्वःतक जिल्ला स्तरीय कासा ग्वसाः ग्वय्धुंकूगु दु ।