अन्ततः सन्दीपयात अमेरिकां भिसा बिल
लहना न्यूज | ने.सं. ११३९ गुंलाथ्व त्रयोदसि (१३ अगष्ट, २०१९), मंगलवाः
![](https://www.lahananews.com/sites/default/files/1565685640sandy_j.jpg)
नेपाली राष्ट्रिय क्रिकेट टिमया लेग स्पिनर सन्दीप लामिछानें अमेरिकाया भिसा प्राप्त याःगु दु । थौं मंगलवाः सुथय् भिसा बीत अस्वीकार याःगु अमेरिकी दुतावासं स्वघौ लिपा भिसा ब्यूगु खः ।
नेपाःया टिमया व्यवस्थापक रमन सिवाकोटीं सन्दीपं भिसा प्राप्त याःगु जानकारी बियादीगु खः ।
थ्व स्वयां न्ह्यः सन्दीपं क्यारेबियन प्रिमियर लिग (सिपिएल) २०१९ म्हितेत अमेरिका जुयाः वनेगु नितिं थौं मंगलवाः येँय् च्वंगु अमेरिकी दूतावासय् भिसाया नितिं आवेदन ब्यूगु खः ।
फुक्क माःगु भ्वं तःसां नं थःत भिसा मब्यूगुलिं अजू चाःगु धासें सन्दीपं ट्विटरय् पोष्ट याःगु खः ।
सिपिएलया निगूगु सिजन म्हितेत्यंम्ह सन्दीप थुगुसी बार्बाडस ट्राइडन्ट्सय् ७८गू लखतकाय् आबद्ध जूगु खः ।
वइगु सेप्टेम्बरया न्हापांगु वालंनिसें न्ह्याइगु लिगया नितिं सन्दीप सेप्टेम्बरया न्हापांगु वालय् वेष्ट इण्डिज थ्यंकेगु ज्याझ्वः दु । थ्व स्वयां न्ह्यः सन्दीपं अमेरिका चाःहिलेगु इच्छा याःगु खः ।
Categorized in कासा