अल्जेरियां त्याकल ‘अफ्रिका कप अफ नेसन्स’
लहना न्यूज | ने.सं. ११३९ दिल्लागा तृतिया (२० जुलाइ, २०१९), सञ्चरवाः
![](https://www.lahananews.com/sites/default/files/aljeria.jpg)
सेनेगलयात बुकूसें अल्जेरियां अफ्रिका कप अफ् नेसन्सया उपाधि त्याकूगु दु । वंगु चान्हय् इजिप्टया कायरोय् जूगु फाइनल कासाय् सेनेगलयात १गू गोलं बुकूसें अल्जेरियां उगु उपाधि त्याकूगु खः ।
कासाया निगूगु मिनेटय् बगदाद बौनेदजाहं याःगु गोल हे अल्जेरियायात त्याकेगु नितिं निर्णायक गोल जुयाबिल । निगूगु हाफय् ह्याण्डबल जूगु धासें सेनेगल विरुद्ध अल्जेरियां पेनाल्टीया ह्वःताः चूलाःगु खः । तर भीएआर अर्थात भिडियो एसिस्टेन्ट रेफ्रीं उगु पेनाल्टी बीम्वाःगु निर्णय यात । ६८गू प्रतिशत पोजिशनय् दुगु सेनेगलं अल्जेरियायात दबाब बीत ताःलाःसां नं गोल धाःसा यायेमफुत ।
सेनेगलं १२क्वःतक अल्जेरियाया पोष्टय् गोल यायेगु कुतः याःसां नं उगु कुतःयात ताःलाके मबिल । थ्व स्वयां न्ह्यः सन् १९९०य् न्हापांखुसि उपाधि त्याकूगु अल्जेरिया निक्वःखुसी च्याम्पियन जुइत ताःलात ।
सन् २००२ स उपविजेता जुगू सेनेगलं थुगुसी नं उपाधि ल्ह्वनेत ताःमलात ।
Categorized in कासा