नाडाल फ्रेञ्च ओपन टेनिस च्याम्पियन
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
![](https://www.lahananews.com/sites/default/files/1560129346%E0%A4%B0%E0%A4%BE%E0%A4%AB%E0%A5%87%E0%A4%B2.jpg)
स्पेनीस कासामि राफेल नाडालं १२क्वः खुसीइ फ्रेञ्च ओपन टेनिसया उपाधि त्याकल ।
विश्व वरियताया प्यंगूगु थासय् लानाच्वंम्हं अष्ट्रियाया डोमिनिक थिएमयात बुकूसें उपाधिइ लगातार स्वदँतक कब्जा यायेत ताःलाःगु दु ।
नाडालं वंगु आइतवाः जूगु फाइनलय् डोमिनिकयात ६-३, ५-७, ६-१ व ६-१या सेटं बुकूगु खः ।
३३दँ दुम्ह नाडाल छगू हे ग्राण्डस्लाम टेनिस उपाधि १२क्वःतक त्याकूम्ह न्हापांम्ह कासामि नं जूगु दु ।
उपाधि त्याकेधुंकाः नाडालं थ्व छगू म्हगस जूगु खँ धयादिसें न्हापांखुसी सन् २००५य् म्हितागु इलय् सन् २०१९य् नं थन दइ धकाः सोचय् मयानागु व थ्व थःगु नितिं अभूतपूर्व पल व अति विशेष जूगु नं धयादिल ।
नाडालं मुक्कं १८गू ग्राण्डस्लाम उपाधि त्याकूगु दु । तर दकलय् अप्वः ग्राण्डस्लाम उपाधि त्याकूम्ह धाःसा स्वीस कासामि रोजर फेडरर खः, गुम्हेस्यां २०गू ग्राण्डस्लाम उपाधि त्याकूगु खः ।
Categorized in कासा