इङ्गल्याण्डयात बुकाः नेदरल्याण्ड्स नेसन्स लिग फुटबलया फाइनलय्
ने.सं. ११३९ तछलाथ्व चतुर्थि (७ जुन, २०१९), शुक्रवाः
![](https://www.lahananews.com/sites/default/files/matthijs-de-ligt-netherlands-2019.jpg)
नेदरल्यान्ड्स इंग्ल्यान्डयात बुकूसें नेसन्स लिग फुटबलया फाइनलय् दुहांवंगु दु । नेदरल्याण्ड्सं आः उपाधिया नितिं पोर्चुगललिसे धेंधेंबल्ला याइ ।
वंगु चान्हय् (बिहीबाः चान्हय्) जूगु कासाय् नेदरल्याण्ड्सं इङ्गल्याण्डयात १गूया विरुद्ध ३गू गोलं बुकाः फाइनलय् दुहांवंगु खः । क्वःछिनातःगु इलय् तक निगुलिं टिम १/१गू गोलया बराबरी जुइवं ई थप याःगु खः । अतिरिक्त इलय् नेदरल्याण्ड्सं थप निगू गोल याःगु खः ।
कासाया ३२गूगु मिनेटय् मार्कोस रास्फोर्डं गोल यासें इङ्गल्याण्डयात न्ह्यःने लाकूगु खः । न्हापांगु हाफतक छगू गोलं न्ह्यःने लाःगु इङ्गल्याण्ड निगूगु हाफय् गोल नयेमाल । म्याथिज डि लिटं ७३गूगु मिनेटय् गोल यासें नेदरल्याण्ड्सयात १/१गू गोलया बराबरी याःगु खः ।
क्वःछिनातःगु इलय्तक निगुलिं टिमं १/१गू गोलया बराबरी जुइवं कासा ई थप याःगु खः । कासाया ९७गूगु मिनेटय् वाल्करं आत्मघाती गोल यायेवं नेदरल्याण्ड्स १गूया विरुद्ध २गू गोलं न्ह्यःने लात । ११४गूगु मिनेटय् नेदरल्याण्ड्सया नितिं प्रोमिसं गोल यायेवं कासा नेदरल्याण्ड्सया पक्षय् वंगु खः ।
Categorized in कासा