थौं लक्ष्मीपूजा, दँया लिपांगु दिं
लहनान्यूज सम्वाददाता | कौलागा आमै ११३६ (अक्टोबर ३० २०१६)
![](https://www.lahananews.com/sites/default/files/laxmi_0.jpg)
थौं स्वन्तिया झ्वलय् लक्ष्मी पूजा, सकसियां छेँय् छेँय् लक्ष्मी द्यः पुज्यानाः हंगु दु ।
थौं सकसियां पिखालखुं बँ थिलाः लक्ष्मी द्यःयात सालाः धुकुतिइ दुत हयाः पुज्यायेगु याइ । थौं लक्ष्मीद्यः पुज्याइगु इलय् द्यःया लिसें वा, तुफि, धनद्रव्य आदिलिसें छेँया लालपुर्जा तकं तयाः पुज्यायेगु चलन दु ।
थौं दँया दक्कले लिपांगु दिनय् मेगु दँय् थःगु छेँज्याया ल्याःचाः यायेगु ल्याखं थुकथं थःगु दक्वं सम्पत्तिया नं ल्याःचाः कायेगु याःगु कथं काइ ।
थौंया चायात मोहरात्री नं धायेगु याः । थौैं मत च्याकाः झःझः धाःगु छेँय् लक्ष्मीद्यः दुहां बिज्याइगु विश्वासय् सकसियां छेँय् छेँय् पाल्चालिसें झिलिमिलि मत तकं च्याकाः छेँ झःझः धायेकेगु याइ ।
थौं लक्ष्मीद्यः पुज्यायेधुंकाः कन्हय धाःसा म्हपुजा यानाः न्हूगु दँयात लसकुस याइ । कन्हय् स्वनिगःया थीथी थासय् थीथी ज्याझ्वःत ग्वसाः ग्वयाः न्हूगु दँयात लसकुस यायेत्यंगु दु ।
Categorized in राष्ट्रिय