देशय् विकास जुइके मबीगु तत्वत सक्रिय : प्रधानमन्त्री ओली
लहनान्युज | ने.सं. ११३९ बछलागा अष्टमि (२७ मे, २०१९), सोमबाः
![](https://www.lahananews.com/sites/default/files/is_5.jpg)
प्रधानमन्त्री केपी शर्मा ओलीं देशय् विकास जुइके मबीगु तत्वत आः नं सक्रिय जुयाच्वंगु धयादीगु दु ।
राष्ट्रिय मानवाधिकार आयोगया झिंगुक्वःगु बार्षिकोत्सवया झ्वलय् थौं सोमवाः येँय् ग्वसाः ग्वःगु ज्याझ्वःयात सम्बोधन यानादिसें प्रधानमन्त्री ओलीं उगु खँ धयादीगु खः । वय्कलं नेपाःयात मानव अधिकारय् कमजोर जूगु देश जुइके मबीगु नं स्पष्ट यानादिल ।
प्रधानमन्त्री ओलीं संविधानकथं जूगु निर्वाचनपाखें सरकार दयेकूगु न्ह्यथनादिसें सिलिण्डर बम कयेकाः आंतकित यासें लुटपाटया नितिं क्रान्तिया नां कायेगु मानवाधिकारया नितिं ग्यानापूगु पक्ष जूगु धयादिल । प्रतिबन्धित नेत्र विक्रम चन्द नेतृत्वया नेपाल कम्यूनिष्ट पार्टींया उद्देश्य धेबा म्हयेगु बाहेक मेगु छुं नं मदुगु प्रधानमन्त्री ओलीया धापू खः । नेपाःयात अशान्तिपाखे घ्वायेगु कुतःयात सरकारं पनेगु प्रधानमन्त्री ओलीं ख्याच्वः नं बियादिल ।
अथे हे प्रधानमन्त्री ओलीं सरकारं प्रेस स्वतन्त्रताय् शतप्रतिशत ग्यारेन्टी यायेगु नं स्पष्ट यानादिल । संविधानय् हे दुगु प्रेस स्वतन्त्रताया व्यवस्थायात सरकारं सम्मान यायेगु धयादिल ।
Categorized in राजनीति