टिकट मिकेत्यःगु बिरुद्ध पत्रकार सम्मेलन
लहनान्युज | चौलागा षष्ठी ११३९ (अप्रिल २५ २०१९)
नेपाल गोल्डेन आइडल सिजन ६ या फाइनलतक थ्यनेधुंकाः नं प्रतिस्पर्धा त्वःतूम्ह यलया प्रतिभावान् मचा गायक प्रतिस्पर्धी स्रजल महर्जनं ग्वसाः खलःपाखे टिकट मिकेत्यःगु बिरुद्ध छगु पत्रकार सम्मेलन याःगु दु ।
एनटिभी २ पाखें प्रत्येक बिहिवाः बहनी ९ः३० ता इलय् व गोल्डेन स्टार टिभी अनलाइन च्यानलपाखें प्रसारण जुयाच्वंगु थुगु प्रतिस्पर्धाय् सलंसः ल्याखय् ल्यज्या जुयावःम्ह गायन प्रतिस्पर्धाय् टप ६ तक महर्जन थ्यंकेत ताःलाःम्ह खः ।
महर्जनलिसे मेमेपिं प्रतिस्पर्धी प्रति ग्वसाः खलकं ब्यूगु न्यासः तकासिबें च्वय्या रकमय् मिइमाःगु मूल्य विहीन टिकट विक्रीपाखें रकम मुंकेगु दबाब, नियम कथं प्रतिभा प्रस्तुतिया मौकां बञ्चित याइगु, प्रतिस्पर्धीप्रति गाली गलौच थें जाःगु दूव्र्यवहार जक मजूसे नेपाःया येँ, चितवन, इटहरी लिसेंया थीथी च्यागू थासय् जूगु सांगितिक यात्राय् नसाँ त्वसाँ तकं नके मब्यूगु, देनेत थाय् तकं मब्यूगु अवस्थां अतिकं दुःखी जुयाः प्रतिस्पर्धाय् निरन्तरता मबिइगु निष्कर्षय् जिपिं वनागु दु धकाः यलय् छगू पत्रकार सम्मेलनयाना थुगु खँया जानकारी बियादीगु खः । पीडित
प्रतिभावान् मचा गायक स्रजल महर्जनया अबु सुरोज महर्जनया ल्हाःचिं तयाः उगु पत्रकार सम्मेलनय् प्रेस विज्ञप्ति सार्वजनिक याःगु खः ।
सुरशाला आइडलपाखें लोकंह्वाःम्ह मचा गायक स्रजल महर्जनया प्रतिभा अझ विकास जुइगु आशां स्रजल ब्वनाच्वंगु स्कूल ज्ञान निकेतन स्कूलपाखें जूगु प्रस्ताव स्वीकार यानाः प्रतिस्पर्धाया निला स्वला ई दुने तःक्वःमछि थीथी चरणया प्रतिस्पर्धाया नितिं थःपिनिगु हे खर्चय् प्रतिस्पर्धा जुयाच्वंगु थाय् पोखरा थ्यंकागु खँ न्ह्यथसें सार्वजनिक याःगु विज्ञप्तिइ उगु ई दुने प्रतिभा विकासया नामय् आपालं हे प्रतारित जूगु व लिपांगु ई सहनशक्ति सिबें अप्वः हे अन्याय जुइधुंकाः थुगु प्रतिस्पर्धा त्याग यायेगु निर्णय यानागु दु धकाः न्ह्यथनातःगु दु ।
अथेहे, छम्ह प्रतिस्पर्धीं धाःकथं न्यासः पाः टिकट मिइगु खःसा गायनपाखे खुम्ह व नृत्यपाखे खुम्ह प्रतिस्पर्धाय् ६,००० टिकट मिइगु दवाव बिःगु खः ।
पत्रकार सम्मेलनय् जानकारी ब्यूकथं टप ७० स दुहाँवःपिं प्रतिस्पर्धी्पिन्सं तकं थथेहे टिकट मिइगु याःगु दु । टिकट मिइ हे माःगु बाध्यात्मक अवस्थाय् टिकट मिइगु याःपिं उपिं प्रतिस्पर्धा दुने मदु ।
