निगु विश्व सम्पदा स्वाइगु गुरुयोजना
नृपेन्द्रलाल श्रेष्ठ | चौलाथ्व द्धादशी ११३९ (अप्रिल १६ २०१९)
येँ महानगरपालिकां २२ सय मिटर दुनेया निगु विश्व सम्पदा क्षेत्र स्वयम्भू व हनुमानध्वाका दरवार दुनेया सम्पदा पदयात्राया गुरु योजना तयार याःगु दु ।
विश्व सम्पदा दिवस—२०१९ या लसताय् वइगु बिहीवाः कुन्हु हनुमानध्वाका दरवार क्षेत्रय् सार्वजनिक याये त्यःगु सम्पदा पदयात्राया गुरुयोजनाय् संस्कृति नाप तजिलजियात पर्यटकीय व्यवस्थापन नाप स्वापू तया स्थानीयया मूर्त अमूर्त सांस्कृतिक पक्षय् पुस्तान्तरण याना ज्या यायेगु लक्ष्य तःगु दु ।
थुगु ज्याझ्वःया बारे थौं छगु महानगरया सम्पदा नाप पर्यटन समितिया कजि येँ मनपा १८ वडा अधक्ष्य न्हुच्छेकाजी महर्जनं पत्रकार भेटघाटय् गुरुयोजनाया बिषयया जानकारी बियादीगु खः ।
सम्पदा पदयात्राया उगु लँय् स्थानीय सांस्कृतिक सम्पदाया प्रवद्र्धन यायेगु, स्थानीय जनताया आर्थिक विकासय् टेवा यायेगु, आन्तरिक नाप बाह्य पर्यटनया विकास यायेगु व सम्पदाया मूल्य मान्यता बारे जनमानसय् चेतना अभिवृद्धि यायेगु दु ।
येँ महानगरपालिकां मूर्त व अमूर्त सम्पदायात म्हसिका, पुस्तान्तरण नाप सम्बद्र्धनय् थुगु ज्याझ्वः पाखें ग्वाहालि जुइगु धका विश्वास याना तःगु दु। सम्पदा पदयात्रा २.२ किलोमिटर दुने करिब २० गु महत्वपूर्ण सम्पदा थासय् अवलोकन न यायेगु ज्याझ्वः दु ।
येँया हनुमानध्वाखा दरबार क्षेत्रं विश्व सम्पदा धलखय् सूचीकृत स्वयम्भू तक थ्यनीबलय् इतिहासया थीथी कालखण्डय् निर्माण जूगु देगः, बहाः बही, ल्वहँहिति, फल्चा, सतः सम्पदात अवलोकन यायेफइगु खँ न्ह्यथनातःगु दु ।
महानगरपालिकां उगु सम्पदात म्हसीकेत थीथी संकेत चिं तइगु, स्थानीय छेँयात परम्परागत स्वरुपय् हइगु, थासं थासय् स्थानियता खने दइगु चित्रकला, अंगः किपाःया प्रदर्शन याइगु, लँपुइ दूगु फल्चा, सतःया मर्मत सम्भार व संरक्षण याइगु ज्या याइ धकाः जानकारी बियादीगु खः ।
उगु निगु सम्पदायात स्वाइगु पदमार्गय् च्वंगु मूर्त व अमूर्त सम्पदा व सांस्कृतिक परम्परातय्गु अभिलेखीकरण, प्रवद्र्धन व संग्रह याइगु जानकारी नं विज्ञप्तिइ न्ह्यथनातःगु दुसा थुकिया नितिं आर्टग्यालरी, पुस्तकालय व पर्यटन सूचना केन्द्र पलिस्था याइगु जानकारी नं बियातःगु दु ।
सम्पदा पदमार्गया लँपु थुकथ दु
हनुमानध्वाखा–मरुसतः–मरु गणेद्यः–मरुहिति–सन्तानेश्वर महादेव–मरु बही–मिच्याः गल्ली– बञ्जा हिति–साः (चिकं मिल)–चस्वाद्वँ–दमाइ त्वाः–सुन्ता गल्ली–पाछै गल्ली–न्यतँद्यःछेँ–आयुर्वेदिक अस्पताल–सामुदायिक लोकेश्वर गल्ली– बुरांख्यः–म्येछ्यों हिति–तप्यँतां–रंजित मल्ल सतःघाट–भेलु महाद्यः–डल्लु चौतारा–निपू हिति भिंद्यःया देगः–धिमे ल्वहं–चारा हिति–भुइख्यः जुयाः स्वयम्भू न्ह्यथनातःगु दु ।
